Британската полиција утрово уапсила 18-годишно момче под сомнение за поврзаност со бомбашкиот напад кој вчера се случи во метро-станицата Парсонс грин, во југозападен Лондон. Идентитетот на момчето не е објавен, а полицијата неговото апсење го опиша како значајно, но се трага и по други осомничени.

Момчето било уапсено во пристанишниот град Довер и е задржано во локалната полициска станица. Довер е главното пристаниште за фериботи меѓу Британија и Франција.

„Имаме важно апсење во истрагата утрово. Иако сме задоволни од напредокот, продолжуваме со истрагатаа, нивото на опасност и понатаму останува критично“, изјави Нил Басу, координатор на антитерористичките единици на полицијата.

Во детонацијата на импровизираната експлозива направа поставена во метрото повредени беа 29 лица. Нивото на тревога вчера беше кренато на „критично“, откако бомбата експлодираше за време на утринскиот шпиц во метрото. Премиерката Тереза Меј рече дека кревањето на нивото на највисок степен беше соодветен и разумен чекор. Полицијата ги повика граѓаните да бидат претпазливи.