Италија стана прва европска земја чии државјани починаа од коронавирусот КОВИД-19. Седумдесет и петгодишна жена од Ломбардија почина набргу по смртта на 78-годишник во болницата во Падова, северна Италија.

Италијанската агенција АНСА објави дека бројката заразени во регионите Ломбардија и Венето се зголемила на 50. Прв случај е пријавен и во северниот регион Пиедмонт, а еден пациент е ставен во изолација во Умбрија.

Како резултат на ова, властите ги затворија сите јавни објекти во десет градови во северна Италија. Најмногу заразени има во градот Кодоњо – 32. Таму е хоспитализиран и првиот пациент, 38-годишник кој се заразил откако бил во контакт со некого кој неодамна се вратил од Кина. Заразени се и неговата сопруга и еден пријател и Министерството за здравство нареди 14-дневен карантин за сите кои биле во контакт со нив.

„Сите универзитети во Венето се затворени поради вонредната состојба со вирусот и така ќе биде до следната недела“, изјави претседателот на регионот Лука Ѕаја.

Градоначалникот на Кодоњо издаде наредба за затворање на сите ресторани, кафулиња, училишта и други јавни места во градот. Министерството им препорача на локалните жители да не излегуваат од дома.