Ќе направиме евалуација на сите препораки за тоа дали децата од 12 до 16 години треба да се вакцинираат, најави денеска министерот за здравство Венко Филипче, додавајќи оти Американската агенција за лекови ја одобри вакцината на „Фајзер“ за деца.
Според Филипче, Комисијата за заразни болести со претставници на Министерството за образование и наука (МОН) периодов ќе работи на тоа да се направат протоколи, вклучувајќи ја и таа за вакцинација, со цел сите ученици од 1 септември да се вратат со физичко присуство во училиштата.
„Во нашите планови за пристигнување на вакцини, таа бројка на деца од 12 до 16 години можеме да ја покриеме со количина. И ќе ја зачуваме, ќе ја проектираме да биде за децата. Нормално дека нема да биде задолжителна. Има работа во однос на тоа да се подготви протокол, има многу препораки како би се одвивала наставата во една училница во однос на циркулација на воздух, отворање на прозори“, кажа денеска министерот.
Од 1 октомври 2020, во школо одат само учениците од прво до трето одделение, а останатите онлајн следат настава. Учениците од дома учат уште од лани од март.
На 6 мај годинава, Канада стана прва земја на светот која ја одобри ковид вакцината на „Фајзер/Бионтек“ за деца од 12 до 15 години, опишувајќи го потегот како светло на крајот на тунелот.
„Фајзер“ претходно соопшти дека децата можат да имаат слични несакани ефекти од вакцината како возрасните, особено по втората доза. Во истражувањето што опфатило 2.260 млади волонтери, никој од целосно вакцинираните деца не се заразил со коронавирус.
Б. НЕСТОРОСКА
