Охрабруваат бројките на новозаболени од ковид-19 во смисла на тоа дека опаѓаат, но премногу е рано да кажеме дека е некаков тренд или оди во насока овој  бран да трае пократко од претходните, рече денеска министерот за здравство Венко Филипче.

Болничките капацитети во Тетово, Гостивар, Кичево и Струга остануваат и натаму максимално исполнети, а во Скопје, рече тој, засега како Ковид-центар останува само болницата во Козле, и нема во ниту една друга болница засега да се прави Ковид-центар како што беше изминатиот период.

„Апелирам, сега пред почетокот на новата учебна година, да се вакцинираат родителите на учениците кои ќе одат во школо и во градинка, родителите на децата под 12 години, кои не смеат да се вакцинираат. Ова е единствен начин да се смени ситуацијата. Историски гледано, сите пандемии и епидемии завршиле со вакцинација, не со прележување“, рече Филипче пред малата сала во „А1 Арената Борис Трајковски“ каде од денес е отворена малата сала како вакцинален пункт.

На вакциналните пунктови во државата и на терен, заклучно со вчера вакцинирани се вкупно 695.525 граѓани. Прва доза вакцина вчера примиле 9.123 граѓани, а вчера вкупно се вакцинирале 13.303 граѓани. Во државата вкупно се аплицирани 1.207.515 дози вакцини, а ревакцинирани се 511.989 граѓани.

Според министерот, расте интерeсот за вакцинација кај возрасната група од 18 до 40 години, и досега се вакцинирани 170 илјади лица, што претставува, вели тој, 26 отсто од вкупното население во тие возрасни групи.

Со последните бројки, 70% од пријавеното население над 70 години имаат примено барем една доза вакцина, 69% од пријавеното  население над 65 години е вакцинирано со барем една доза вакцина, 65% од пријавеното население над 60 години е вакцинирано со барем една доза вакцина и 56% од пријавеното население над 50 години е вакцинирано со барем една доза вакцина.

Вкупно ковид-дијагностицирани лица во нашата земја од почетокот на епидемијата се 171.576, оздравени се 153.148, починаа 5.755, а активни случаи се 12.673.

Б. НЕСТОРОСКА