ЗА 50 % НАМАЛЕНА ЦЕНАТА НА КОВИД ТЕСТОВИТЕ, ФОНДОТ ЌЕ ПЛАЌА НА ДРЖАВНИТЕ ЛАБОРАТОРИИ 1.850 ДЕНАРИ ПО ТЕСТ

    ЗА 50 % НАМАЛЕНА ЦЕНАТА НА КОВИД ТЕСТОВИТЕ, ФОНДОТ ЌЕ ПЛАЌА НА ДРЖАВНИТЕ ЛАБОРАТОРИИ 1.850 ДЕНАРИ ПО ТЕСТОд Фондот очекуваат дека намалената референтна цена во јавното здравство ќе ги намали цените и во приватните лаборатории кои сè уште наплаќаат околу 3.500 до 4.000 денари, а во некои случаи кога се бара брз резултат и до 9.000 денари; - Мобилната станица за тестирање на болницата Жан Митрев (Фото: Ѓ. Личовски)

    Фондот за здравство воведе нова, намалена цена на тестовите за ковид-19. Тестирањето на сите пациенти што се со индикација за ковид-19 во државните лаборатории и понатаму е бесплатно, но наместо 3.600 денари, референтната цена по која ќе им биде рефундирано на болниците и лабораториите за ПЦР тестови ќе биде 1.850 денари.

    Како што објаснуваат од Фондот за здравство за САКАМДАКАЖАМ.МК пониската референтна цена е поради помалите трошоци за медицински и друг потрошен материјал и големиот број на тестови кои се изведуваат во серија.

    „Земајќи ја предвид моменталната состојба во однос на пандемијата со коронавирусот и потребата од зголемување на бројот на пациенти за кои е потребно да се изврши молекуларна дијагностика за детекција на вирусот, како и вклучување на приватните лаборатории, кои ја даваат оваа услуга во мрежата на здравстевни установи, Комисијата за референтни цени направи ревизија на постоечката цена. На Управниот одбор на Фондот за здравство беше донесена одлука за воведување нова здравствена услуга за детекција на ковид-19 со ПВР-полимераза верижна реакција во реално време, со референтна цена помала од цената на тестот со оваа метода за другите микроорганизми“, велат од Фондот за здравство.

    При формирањето на цената била направена анализа на доставените податоци за реалните трошоци од приватните лаборатории, Институтот за јавно здравје и МАНУ. Во новата цена е пресметан трошокот за персонал, режиските трошоци и потрошниот материјал за правење на тестот. Трошоците за персоналот се пресметани на 125 денари, режиските трошоци 205 денари, а материјалите за правање на тестот 1.520 денари, па оттука е донесена одлуката цената на ПЦР тестот да биде 1.850 денари.

    Од почетокот на епидемијата до сега, вкупно се направените 176 илјади ПЦР тестови. Според последните бројки на Институтот за јавно здравје, повеќе од половината (55%) се направени на државно. Но, последните неколку дена повеќе тестирања се прават во приватните болници и лаборатории отколку во државните бидејќи за да се добие термин за бесплатни тестирање на државно, пациентите не ја поминуваат епидемиолошката анкета кај матичните лекари.  Ако пациентот има само еден симптом покрај зголемената температура над 37,5, на пример изгубен осет за мирис и вкус, тоа не е доволно за да го поминат алгоритмот. Тие што имале контакт со регистриран заболен, а немаат симптоми, исто така не го поминуваат епидемиолошкиот прашалник за тестирања, па затоа многумина од страв се тестираат приватно.

    Од Фондот очекуваат дека намалената референтна цена во јавното здравство ќе ги намали цените и во приватните лаборатории кои сè уште наплаќаат околу 3.500 до 4.000 денари, а во некои случаи кога се бара брз резултат и до 9.000 денари.

    А. АНТЕВСКА


    ГЛАСНО - во САКАМДАКАЖАМ.МК пријавете проблеми во здравствениот систем


    Почитувани читатели, ни треба вашата помош за заедно да ги откриеме, истражиме и придонесеме за решение на какви било проблеми што го отежнуваат или оневозможуваат пристапот до квалитетна услуга во јавното здравство. Пишете ни за вашите проблеми со здравствените институции низ целата земја. Ви благодариме на довербата.

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира