Бројката новозаболени од ковид-19 за една недела се зголеми за 25 отсто, односно регистрирани се 3.504 нови позитивни случаи во 33 градови, стои во извештајот на Институтот за јавно здравје (ИЈЗ) за периодот од 1 до 7 ноември. За споредба, од 25 до 31 октомври, беа регистрирани 2.804 нови позитивни случаи од 32 градови во државата со зголемување од 3,7% во однос на периодот од 18 до 24 октомври.

Во земјава активни се 7.859 болни од кои половината во Скопје. Моментално се хоспитализирани 548 лица, а од нив 361 се на кислородна поддршка и 40 на инвазивна/неинвазивна механичка вентилација. Од 25 до 31 октомври, во болниците имало 467 лица.

Во текот на мината недела  се пријавени 49 реинфекции, со зголемување од 28,9% во однос на претходната недела.

Од 1 о 7 ноември тестирани се 22.100 материјали, со зголемување од 5,4% во однос на минатата недела.

Процентот на позитивност се движи од 11,9% до 18,6%, просечно 15,7%. Најголем дел од регистрираните случаи се од Скопје (1.449; 41,3%), а највисока неделна инциденца е регистрирана во Кавадарци 431,9/100.000 и Крива Паланка 347,8/100.000.

Регистрирани се заболени лица во сите возрасни групи. Најзастапена е возрасната група на лица на возраст над 60 (850, 24,3%). Најмал број е регистриран кај возрасната група од 0-9 (125; 3,6%). Се забележува зголемување на бројот на заболени кај сите возрасни групи, со најзабележително зголемување кај возрасната група од 0-9 години, 33,0% повеќе во однос на претходната недела.

Во однос на дистрибуцијата по пол, пријавени се 1.934 (55,2%) лица од женски и 1.570 (44,8%) од машки пол.

Пријавени се 79 смртни случаи во 19 градови во текот на изминатата недела, најголем дел од нив се од Скопје (31). Најголем број (67; 84,8%) од починатите припаѓаат на возрасната група над 60 години, а регистрирани се починати лица и кај возрасната група од 50-59 години (5), 40-49 години (3), 30-39 години (3) и од 10-19 години (1 лице).

Со статус оздравени се стекнале 2.294 лица кои биле хоспитализирани или на домашно лекување.

Б. НЕСТОРОСКА