Во скопските средни училишта „Панче Караѓозов“ и „Зеф Љуш Марку“ утре почнува тестирањето за ковид-19 со земање брис од грло и нос на учениците. Утре, како што соопшти Министерството за здравство, ќе се тестираат 258 средношколци од Скопје, а низ државата продолжува во Кривогаштани, Берово, Вевчани, Дебарца, Демир Капија, Дојран, Зрновци, Конче, Лозово, Могила, Новаци, Пехчево, Старо Нагоричане и Центар Жупа.

Вкупно, 8.178 ученици од 80 општини и градот Скопје, од 364 основни и 109 средни училишта низ земјава ќе бидат опфатени со скринингот за рано детектирање и превенција од ковид-19.

Тестирањето се врши во координација со Министерството за образование и наука (МОН), а ќе се спроведува во просторија одредена од страна на училиштето. Тестирањето ќе трае помалку од една минута.

„Тестирањето е безболно и безбедно, со земање на брис од грло и од носна шуплина. Целта на скринингот е рано детектирање и евентуално пронаоѓање на асимптоматски носители на вирусот ковид-19 помеѓу учениците. Со релевантните податоци ќе се добие целосна слика на трансмисија на вирусот во училиштата, во интерес на децата“, велат од Министерството и апелираат на поддршка од родителите при давање на потребната согласност.

Б. НЕСТОРОСКА