Рускиот претседател Владимир Путин му рекол на француски претседател Емануел Макрон дека Западот ги игнорирал безбедносните грижи на Русија, среде стравувањата дека Русија може да ја нападне Украина. САД го отфрлија клучното барање на Москва, НАТО да ја отфрли можноста Украина да влезе во Алијансата, но инсистираа дека ѝ нудат на Русија „дипломатски пат“.
Претседателот Џо Бајден предупреди дека постои „далечна можност“ Русија да ја нападне Украина следниот месец. Русија негира дека планира напад.
Но, денеска Путин му рече на Макрон дека проблемот не е решен.
„Одговорите на САД и НАТО не ги земаа предвид клучните руски грижи, како што се спречување на проширувањето на НАТО, нераспоредување ударни оружени системи во близина на руските граници или враќање на воениот потенцијал и инфраструктурата на алијансата во Европа на позициите што постојат во 1997“, објави Кремљ.
Тоа е првиот коментар на Путин за кризата откако САД го отфрлија главното барање на Русија. Тој му рече на Макрон дека внимателно ќе ги проучи контрапредлозите на САД, пред да одлучи за каква било понатамошна акција. Претходно, рускиот министер за надворешни работи Сергеј Лавров изјави дека има „зрнца на рационалност“ во американскиот одговор и дека Русија не сака војна.
Набргу по коментарите на Путин до Макрон, генералниот секретар на НАТО Јенс Столтенберг рече дека Алијансата е подготвена да го зголеми своето присуство во Источна Европа за да ја покаже својата решителност. Столтенберг рече дека Русија распоредува илјадници борбени трупи и ракетни системи во Белорусија, која исто така граничи со Украина.
Русија минатиот месец поднесе широки безбедносни барања од Западот, меѓу кои и: на Украина треба да ѝ се забрани влез во НАТО; НАТО треба да ја прекине воената активност во Источна Европа и да ги повлече трупите од Полска и балтичките републики Естонија, Латвија и Литванија; Алијансата не треба да распоредува ракети во земји кои се во близина или граничат со Русија.
САД и НАТО одговорија дека Украина има право да избира свои сојузници, но ѝ понудиле на Русија разговори за распоредување ракети и други прашања.
