Американскиот претседател Џо Бајден ја предупреди Русија дека САД нема да се исплашат од непромислени закани откако рускиот претседател Владимир Путин вчера прогласи анексија на четири окупирани региони на Украина. Вчера, се чинеше дека претседателот Путин упати скриена закана дека ќе користи нуклеарно оружје за одбрана на тие региони. Тој рече дека тие „засекогаш“ ќе бидат Руски – но Украина вети дека ќе ги ослободи. Шефот на НАТО Јенс Столтенберг рече дека рускиот потег е „најсериозната ескалација од почетокот на војната“.

Во говорот во Москва, Путин изјави дека граѓаните во источните украински региони Доњецк и Луганск, како и во Херсон и Запорожје на југ, гласале да бидат „со својот народ, со својата татковина“. Тој мислеше на таканаречените референдуми што се одржаа во регионите во последните денови, но Украина и западните влади го осудија гласањето како лажно. Поголемиот дел од говорот на Путин беше искористен за напад на Западот. Тој, како очигледна закана, рече дека САД создале „преседан“ со употреба на нуклеарно оружје против Јапонија на крајот на Втората светска војна. Путин минатата недела рече дека неговата земја има „различно оружје за уништување“ и дека „ќе ги искористи сите средства што ни се достапни“, додавајќи: „Не блефирам“.

Кремљ јасно стави до знаење дека секој напад врз регионите што ги презема Русија ќе се смета за напад на руска територија, што сигнализира ескалација на војната. Русија не контролира целосно ниту еден од четирите региони, а во говорот Путин не ги дефинираше јасно границите.

Претседателот Бајден рече дека зборовите на Путин се „непромислен и закани“, но додаде дека тој „нема да не исплаши“.

„Америка и нејзините сојузници нема да бидат заплашени“, рече претседателот Бајден во Белата куќа. Потоа директно му се обрати на рускиот претседател, вперувајќи го прстот во камерата.

„Америка е целосно подготвена, со нашите сојузници од НАТО, да ја брани секоја педа од територијата на НАТО“, рече тој, во врска со западниот безбедносен блок. „Господине Путин, не разбирајте погрешно што велам: секоја педа“.

Набргу потоа, највисокиот функционер за национална безбедност на Бајден рече дека иако има шанси Москва да прибегне кон нуклеарно оружје, се чини дека нема непосредна закана.