Со едноминутен молк и полагање цвеќе пред споменикот на Свети Климент Охридски, студентите од Битолскиот универзитет денеска изразија почит кон 59-те жртви, главно на возраст од 14-25 години, во пожарот во дискотеката „Пулс“ во Кочани.
На студентите им се придружи и Ректорската управа и професорскиот кадар на Универзитетот, а сите се потпишаа во книгата на жалоста.
Над 150 лица се повредени, дел од нив тешко, во пожарот во дискотеката Кочани на 16 март. Во странство до сабајлево се испратени на лекување 76 повредени.
Основниот суд Кочани вчера даде краткотраен притвор на 8 плус 6 осомничени за катастрофалниот пожар во дискотеката „Пулс“, меѓу кои и ексминистерот за економија Крешник Бектеши и ексдиректорот на Државниот пазарен инспекторат Горан Трајковски, за да може со нив приведените да се задржат на распит повеќе од 24 часа. По истекот на овие 48 часа, ќе се знае за кого од овие осомничени обвинителите ќе побараат 30-дневен притвор. Претходно на распит кај обвинител, но не и кај судија на претходна постапка, беше градоначалникот на Кочани Љупчо Папазов. По сослушувањето, си заминал дома, не бил донесен во судот.
Ж. ЗДРАВКОВСКА
