„Во Скопје не сум дојден како Ренато Занела, туку во име на стотици светски оперски ѕвезди кои му се благодарни за сѐ на Аки“, рече вечерва во Македонската опера и балет (МОБ) светски познатиот режисер и кореограф, на настанот насловен како „Вечер со Аки Нуредини“.
МОБ како дел од Мајските оперски вечери ја организираше промоцијата на книгата на Нуредини, родум од тетовското село Камењане, кој е сопственик на познатиот ресторан „Соле“ во Виена, омилено место на оперскиот џет-сет и на австриските политичари и дипломати.
Занела, кој бил уметнички директор на Виенската државна опера, како и на Грчкиот национален балет во Атина, во МОБ го промовираше македонското издание на книгата „До ре ми фа СОЛЕ“, која беше издадена пред 5 години, а која е посветена на ресторанот „Соле“, со сите животни приказни на светските оперски имиња кои станаа пријатели на Аки.
Весел и непосреден, искрено кажа дека не сакал да пишува книги, но пријателите како Ренато, Пласидо Доминго и Ана Нетребко го убедиле да пишува, и така ја напишал книгата (Фото: Ѓ. Личовски)
Самиот Нуредини пак во Виена е познат како неформален амбасадор на Македонија бидејќи неговиот ресторан е сврталиште на македонски политичари, бизнисмени, уметници и добронамерници кои го посетуваат австрискиот главен град, или како што рече вечерва тој самиот, „Соле“ не е ресторан, туку институција, интересен спој на култура и политика.
Вечерта ја отвори Аки, кој ѝ се заблагодари на сопругата со која се заедно 43 години и која го поддржува низ целиот свет.
Весел и непосреден, искрено кажа дека не сакал да пишува книги, но пријателите како Ренато, Пласидо Доминго и Ана Нетребко го убедиле да пишува, и така ја напишал книгата, чие прво издание со тираж од 7.000 примероци брзо се распродало и потоа ја реиздале.
Аки сподели дека во 1981 година, како дете, заминал за Белград и оттаму за Виена, вели, поради класичната музика и културата. Не било лесно, но вели, имал среќа.
„Позитивноста и желбата секојдневно да ги спојувам луѓето, тоа е мој специјалитет, моја пасија. Со позитивна мисла, сѐ е е можно“, рече Аки.
Занела рече дека каде и да патува низ светот, во Мадрид, Лондон, Њујорк, нема кој не го прашал како е Аки, бидејќи сите уметници го чувствуваат дека е дел од нивниот секојдневен живот.
„Во 1983 година, после една проба, јас млад танчар, бев мртов гладен и уморен и барав место каде да јадам, сакав италијанска храна.
Влегов во ‘Соле’, прашав дали е сѐ уште отворено, бидејќи веќе беше доцна, но Аки ми рече : ‘Влези, ќе подготвиме нешто“. Оттогаш, до ден денес седиме на истата маса, со истата топлина и ентузијазам“, рече Занела.
Како голем пријател на Аки, тој на 26 април им се придружи на министрите за надворешни работи на Македонија и на Грција, Никола Димиров и Никос Коѕијас на вечерата во „Соле“ по завршувањето на рундата преговори за разликите околу името.
Режисерот продолжи дека уметниците во нивната професија се многу осамени, и затоа многу им значи поддршката на Аки, за кого сите велат, рече тој, дека е уметник, креативец, пријатен и инспиративен човек кој има многу идеи.
„Позитивноста и желбата секојдневно да ги спојувам луѓето, тоа е мој специјалитет, моја пасија. Со позитивна мисла, сѐ е е можно“, вели Аки (Фото: Ѓ. Личовски)
„Во книгата има најврвни уметници, но за нас, Аки е ѕвездата“, рече тој, за кого Аки во говорот откри дека ќе работи во МОБ.
Топлата атмосфера со гостите, семејството и пријателите продолжи со рециталот со сопранот Ирена Крстевска и тенорот Дарко Нешовски, во пијано придружба на Андреј Наунов.
Б. НЕСТОРОСКА
