10 БОЛНИ ОД РЕТКАТА БОЛЕСТ ПУЛМОНАЛНА ХИПЕРТЕНЗИЈА ЌЕ ОСТАНАТ БЕЗ ДРЖАВНИ ЛЕКОВИ, ИАКО ФИЛИПЧЕ ВЕТИ ЛЕК ЗА СИТЕ

    10 БОЛНИ ОД РЕТКАТА БОЛЕСТ ПУЛМОНАЛНА ХИПЕРТЕНЗИЈА ЌЕ ОСТАНАТ БЕЗ ДРЖАВНИ ЛЕКОВИ, ИАКО ФИЛИПЧЕ ВЕТИ ЛЕК ЗА СИТЕПрограмата ги дискриминира сите кои страдат од оваа болест бидејќи од вкупно 20 болни, ги опфаќа само пациентите кај кои е констатирана како примарна, а не и како резултат од друго заболување; - Во декември, 30-на маратонци трчаа од Струмица до Гевгелија за обезбедување на потребната терапија за болните со пулмонална хипертензија (Фото: СДК.МК)

    Пациентите со пулмонална хипертензија (ПХ) се изненадени од програмата што ја објави Министерството за здравство за ретки болести и тврдат дека со неа лекови на сметка на државата нема да добијат сите заболени. Според Здружението „Момент плус“, програмата ги дискриминира сите кои страдат од оваа болест бидејќи ги опфаќа само пациентите кај кои е констатирана како примарна, а не и како резултат од друго заболување. Станува збор за околу 10 пациенти со ПХ во земјава, кои и оваа година сами ќе мора да се снабдуваат со потребните лекови.

    Од „Момент плус“ тврдат дека на средбите пред нова година добиле ветување од министерот Венко Филипче дека ќе бидат опфатени сите пациенти со пулмонална хипертензија но, со објавената програма ќе извисат оние кај кои ПХ се води како секундарна болест.

    „За пациентите кај кои болеста се третира како секундарна нема да има лекови на товар на државата, иако ни беше ветено. За жал, меѓу нив има и деца чии семејства ќе мора сега сами да се снаоѓаат со потребната терапија која е доста скапа. Станува збор за дополнителни 6.600 евра годишно од државниот буџет за да бидат опфатени и овие пациенти“, вели Ирена Коцев која постојано испраќа дописи до Министерството дека објавената програма е дискриминаторска.

    Според сознанијата на здруженијата, во земјава од пулмонална хипертензија независно дали е примарна или секундарна болест страдаат 20-на пациенти и станува збор за белодробно заболување кое болните ги остава без здив.

    Министерот за здравство Филипче, при последната посета на Струмица пред Нова година, најави дека сите пациентите со Пулмонална хипертензија ќе добијат терапија на сметка на државата.

    „После укажувањата на пациентите имавме неколку средби со нивните здруженија, постапката е во тек и верувам наскоро ќе ги добијат лековите“’, одговори Филипче во декември на новинарско прашање дали сите пациенти со ПХ ќе добијат терапија на сметка на државата.

    Во декември, 30-на маратонци трчаа од Струмица до Гевгелија за обезбедување на потребната терапија за болните со пулмонална хипертензија. Во Гевгелија ги пречека Ѓурѓица Ќаева, која со години страда од оваа ретка болест.

    И таа наоѓа забелешки на објавената програма, бидејки само лекари од државна клиника може да потврдат дека пациентот страда од ретката болест ПХ.

    „За мене беше ветувано дополнителна терапија. Преку мојот лекар од ‘Жан Митрев клиника’ теравме цела процедура, дури ја контактиравме и фармацевтската компанија која го има лекот и сега на крај сè падна во вода“, вели Ќаева.

    В. ТРАЈКОВ

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари