Федерална инспекторка за животна средина од САД, месец и половина го обучувала инспекторите на Град Скопје, кои заедно со неа вршеле инспекциски надзори, спроведувале контроли и разменувале искуства за начинот и постапките на контролирање.
„Договорено е со амбасадата на САД во земјава соработката да продолжи и во иднина, со слични активности. Токму советите и обуките придонесоа Инспекторатот лани да постигне резултати кои се многу подобри од другите години. Лани зголемен е и бројот на инспектори за животна средина, од 4 на 8 инспектори. На наше инсистирање, беше сменет правилникот за граничните вредности за дозволените нивоа на емисии и видови на загадувачки супстанции во отпадните гасови и пареи кои ги емитираат стационарните извори во воздухот, без кој во минатото им биле врзани рацете на инспекторите. Го зголемивме бројот на возила од 3 на 8 што се неопходни за брза и ефикасна реакција. Добивме и донација од УНДП, два дрона целосно опремени со термални камери и камери за ноќно снимање што ќе придонесат за откривање и лоцирање потенцијални загадувачи“, рече раководителот на Инспекторатот на Град Скопје Мирослав Богдановски.
Градоначалникот Петре Шилегов рече дека лани, за разлика од изминатите години, градските инспекторите извршиле многу повеќе контроли и изрекле повеќе казни.
„Инспекторатот на Град Скопје е прва институција од ваков вид во нашава држава која работи 24 часа. Во однос на комуналната инспекција, за 237 проценти е зголемен инспекциски надзор на комуналните инспектори односно во 2018 година извршени се 92 контроли, а во 2019 година имало 310. Во 2019 година изречени се 127 платни налози, што е за 807 отсто повеќе во однос на 2018 година кога се изречени само 14 налози. Процесирани се 115 барања за поведување прекршочна постапка во 2019 година, што е за рекордни 1.177 отсто повеќе во однос на 2018 година кога се процесирани 9 акти“, рече Шилегов.
Шилегов и Богдановски кажаа дека многу поуспешно ќе можат да функционираат кога ќе се воведе Закон за комунална полиција, кој се надеваат ќе биде донесен после изборите.
А. АНТЕВСКА
