Пожар изби во дворот на поранешната фабрика „Треска“ во скопската општина Центар. Како што изјавија за САКАМДАКАЖАМ.МК од Центарот за управување со кризи (ЦУК), гори магацински простор.
„На бројот 112 беше пријавен пожар во фабриката ‘Треска’ и на терен во моментов го гасат 6 возилата на Пожарната на Град Скопје. Покрај објектот гори и пластика и затоа чадот е толку темен. Се интервенира, и кога ќе бидат изгаснат ќе информираме“, ни изјавија од ЦУК.
Кусо по пристигнувањето на пожарникарите, полицијата почна ги трга сите присутни од местото поради опасност од експлозии. Пожарникарите не можат да стасаат поблиску до пожарот.
Улицата Теодосиј Гологанов е блокирана.
„Нешто силно пукна, мислевме дека е принтерот и веднаш потоа видовме голем чад отспротива“, ни рече вработена во фирма на Рузвелтова што гледа кон комплексот на поранешните погони на фабриката за мебел.
Просторот кај „Треска“ е актуелен поради новите згради кои таму треба да се градат и битката на граѓанските организации со Општина Центар и инвеститорите да не се дозволи и тој дел да се бетонизира.
Голем пожар кај Треска. pic.twitter.com/ir4RUDs8lF
— Sakam da Kazam (@SDKsakamdakazam) April 14, 2022
А. АНТЕВСКА
