По реакции во јавноста и на советниците во општинскиот Совет, градоначалникот Марко Колев одговорноста зошто во Велес не се одбележа 9 Мај, Денот на победата над фашизмот и Денот на Европа, ја префрли на администрацијата. На овој ден во Велес традиционално се положуваше цвеќе и оддаваше почит во Спомен-костурницата. Годинава тој чин на локалните власти и градоначалникот изостана.
На седницата на Советот, меѓу советничките прашања, советниците и од Левица и од СДСМ го прашаа градоначалникот Марко Колев зошто го заборави овој датум.
„Има пропуст во Одделението за култура. И јас реагирав, но веќе беше доцна. За тој ден ми беа договорени неколку активности, не и одбележувањето на Денот на победата. И јас сметам дека треба да се положи цвеќе на овој датум на Спомен-костурница. Ѝ укажав на раководителката на ова одделение, дека иако овој ден не е во програмата за одбележување, треба да се оддаде почит на паднатите борци и жртви. Ова што се случи не е намерно, туку е пропуст, не бев информиран, не можам сè да следам и пратам за активностите кои ги имам. Слично беше и со 28 Април, Денот на гемиџиите, ад-хок беше оддавањето на почит“, кажа градоначалникот Колев.
Спомен-костурницата во Велес е местото каде почиваат посмртните останки на 378 партизани борци на НОБ и 209 жртви на фашизмот, сите родум од Велешко, кои загинале во четиригодишната борба за слобода.
П. ПЕЧКОВ
