Во средното хемиско училиште „Марија Склодовска-Кири“ денеска нема настава, бидејќи екипи на Пожарната брига и ЈП „Улици и патишта“ го отстануваат покривот кој беше уништен во вчерашното невреме. Градоначалникот Петре Шилегов вели дека летово кога се вршела санација на фасадата на училиштето не бил вклучен и покривот, бидејќи тој бил реновиран во 2009 од Министерството за образование кога министер бил Никола Тодоров од ВМРО-ДПМНЕ.

„Проценката беше дека нема потреба да се врши реконструкција на нешто што било направено бргу. За жал, како што можете да видите, состојбата на покривот е таква каква што е, што покажува дека во минатото при градежните работи не се внимавало на квалитетот. За разлика од покривот, фасадата која ние ја направивме е во добра состојба, нема никакво оштетување за разлика од другите фасади од ‘Скопје 2014’“, рече градоначалникот Шилегов.

Откако во вчерашното невреме беше уништена и барокната фасада на државната компанија МЕПСО, за која беа потрошени 11 милиони евра, градоначалникот Шилегов рече дека токму тоа е уште еден доказ дека проектот „Скопје 2014“ треба да се урне.

„Конечно, некои дилеми кои ги имаше за носење на политичка одлука како да се постапува со објектите и спомениците од ‘Скопје 2014’, мислам дека ќе исчезнат. Очекувам после изборите новата влада предводена од СДСМ да ги послуша советите на работната група за ‘Скопје 2014’ и ова брутално силување на Скопје, конечно да се реши на соодветен начин. Се надевам дека новата влада ќе изнајде и пари да се отстранат и бродовите од Вардар, кои исто така се опасност при поголеми врнежи“, рече Шилегов.

А. АНТЕВСКА