Пет јавни плажи на охридското крајбрежје ќе добијат современа инфраструктура за лицата со попреченост, а Општина Охрид ќе набави и специјализирано возило кое ќе им биде на располагање на корисниците. Ова се дел од активностите што ќе се реализираат преку проектот „АДВЕНТУР 2 – Достапна прекугранична авантура“ (ADVENTOUR II – Accessible Adventure Across the Borders), чија цел е развој на пристапен и инклузивен туризам и создавање заедничка прекугранична туристичка понуда меѓу Македонија и Грција.
Проектот предвидува подобрување на пристапноста на пет јавни плажи преку поставување современа урбана опрема, пристапни патеки, соблекувални, санитарни јазли и други инфраструктурни решенија што ќе овозможат полесен и побезбеден пристап до езерото за лицата со попреченост.
Во Охрид вчера се одржа првиот координативен состанок во рамки на проектот, кој се реализира преку програмата Интеррег 6 -А ИПА Грција-Северна Македонија Програма 2021-2027 (Interreg VI-A IPA Greece – North Macedonia Programme 2021–2027). На состанокот учествуваа претставници на Општина Охрид, YMCA од Солун, Грчката национална туристичка организација, Мрежата за рурален развој од Скопје и Извидничкиот одред „Крсте Јон“ од Струга.
„Со реализацијата на проектот очекуваме значително подобрување на пристапноста на охридските плажи, подобри услови за безбедност и рекреација, развој на инклузивен и одржлив туризам и збогатување на туристичката понуда. Покрај инфраструктурните зафати, ќе биде набавено и специјализирано возило за лицата со попреченост, кое Општина Охрид ќе го стави на располагање и ќе се грижи за неговото одржување“, рече Ѓоко Апостолов, раководител на Секторот за туризам и локален економски развој при Општина Охрид.
Димитрис Папас од YMCA од Солун кажа дека проектот има за цел воспоставување прекугранична рута за пристапен авантуристички туризам која ќе ги поврзе планинските и езерските туристички дестинации во двете соседни земји, и оти заедничката работа на партнерите ќе придонесе за успешна реализација на сите предвидени активности.
Од Мрежата за рурален развој од Скопје рекоа дека нивниот фокус ќе биде насочен кон поголемо вклучување на локалните заедници, подигање на свеста за пристапниот туризам и организирање обуки за сите засегнати страни, со посебен акцент на лицата со попреченост.
Проектот „AДВЕНТУР 2“ се очекува да отвори нови можности за развој на пристапен и инклузивен туризам, да ја унапреди туристичката понуда во прекуграничниот регион и да придонесе за поголема социјална инклузија преку еднаков пристап до туристичките и рекреативните содржини.
С. ВРЕНЦОВСКА
„Овој текст е изработен со финансиска поддршка од Шведска преку проектот „Поддршка за европската интеграција на Северна Македонија“, имплементиран од Канцеларијата на Обединетите нации за проектни услуги (УНОПС). Содржината на овој текст е единствена одговорност на дигиталната редакција САКАМДАКАЖАМ.МК и на никаков начин не може да се смета дека ги одразува ставовите на Шведска и УНОПС“.
