Советниците на ВМРО-ДПМНЕ и „Вреди“ во Советот на Град Скопје вчера не ја прифатија иницијативата на Левица еден автобуски билет да важи 120 минути од првото валидирање. Советничката од Левица Дарја Мустафаоглу, предложи на дневен ред да се стави точка со која ќе има измени во јавниот превоз, со што граѓаните нема да мора при менување на автобус повторно да плаќаат билет.

„Во град со нередовни линии, расипани автобуси и населби без директна поврзаност дури ни во рамки на самите општини, не смее патникот да ја плаќа цената на хаосот што не го создал. На пример, од Волково за да се стигне до Бит Пазар треба да се сменат два автобуса и притоа да се платат два билета. Ова што го предлагаме е пракса што е одамна прифатена во многу европски земји, каде граѓаните можат во одреден временски период да сменат повеќе автобуси или да комбинираат неколку превозни средства од јавниот превоз, автобус, метро и железница“, рече советничката Мустафаоглу.

• ПОНИШТЕН ТЕНДЕРОТ ЗА 150 ЕЛЕКТРИЧНИ АВТОБУСИ ШТО ГО ДОБИЈА „ЕЛЕКТРОБУС-ИКАРУС“ И ЕВН, МИНИСТЕРСТВОТО ЗА ТРАНСПОРТ ЌЕ РАСПИШЕ НОВ

• СИЛНО БЕВ ПОГОДЕН КОГА ЧУВ ДЕКА ПРОПАДНА ТЕНДЕРОТ ЗА НОВИ АВТОБУСИ, РЕЧЕ ЃОРЃИЕВСКИ

• ДНЕВНО СЕ ИСПРАВНИ 185 И ВОЗАТ САМО 157 АВТОБУСИ ОД ВКУПНО 341 НА ЈСП „СКОПЈЕ“

Но, оваа иницијатива не беше ниту ставена на дневен ред за да може да се дискутира по неа. Мнозинството во Советот кое го имаат ВМРО-ДПМНЕ и „Вреди“ гласаа против.

На седницата од мнозинството не беше прифатена ниту една иницијатива на опозицијата.

Скопје сè уште е без редовен автобуски превоз иако градоначалникот Орце Ѓорѓиевски во изборната кампања вети дека овој проблем ќе го реши. Нови автобуси уште не се набавени, ниту пак има шанси годинава да се купат, бидејќи тендерот кој го распиша Министерството за транспорт и врски пропадна по вторпат.

Ѓорѓиевски најави продолжување на проектот за Брзиот автобуски превоз (БРТ) кој го почна ексградоначалникот Петре Шилегов, а советниците од неговата партија ВМРО-ДПМНЕ во времето на Шилегов и Данела Арсовска го блокираа и критикуваа. За реализација на овој проект потребни ќе бидат неколку години, што значи дека во брзо време нема да има решение за јавниот превоз во Скопје.

А. АНТЕВСКА