ЗА ТРИ ДЕНА 18 НОВИ ПОЗИТИВНИ СО КОВИД-19 ВО ВЕЛЕС, ЖИТЕЛИТЕ УПЛАШЕНИ, ГРАДОНАЧАЛНИКОТ ВЕЛИ НЕМА МЕСТО ЗА ПАНИКА

    ЗА ТРИ ДЕНА 18 НОВИ ПОЗИТИВНИ СО КОВИД-19 ВО ВЕЛЕС, ЖИТЕЛИТЕ УПЛАШЕНИ, ГРАДОНАЧАЛНИКОТ ВЕЛИ НЕМА МЕСТО ЗА ПАНИКА„Во Велес има зголемен број на заболени, не можеме да прецизираме од овој или оној дел, туку секаде, целата територија е контаминирана“, изјави епидемиологот д-р Билјана Трајкова. (Фото: СДК.МК)

    Граѓаните стравуваат, надлежните смируваат, откако во Велес за три дена се регистрираа нови 18 случаи на коронавирусот. Во вторникот имаше четири случаи, вчера пет и денес девет позитивни на КОВИД-19, додека на 1 мај шест случаи. Повеќето од регистрираните случаи се поврзани со вработени во текстилна конфекција и нивни блиски.

    Реакциите на јавноста во градот се дека и покрај предупредувањата на вработените оти имаат симптоми, биле приморани да одат на работа, сè додека не ги добијат резултатите од земените брисеви. Оваа реакција која излезе во медиумите, од раководството на конфекцијата ја демантираат.

     

    На денешната прес-конференција, министерот за здравство Венко Филипче кажа дека засега не е идентификуван кластерот кој во Велес осетно го зголеми бројот на заразени.

    „На добар пат сме да го идентификуваме кластерот. На терен се екипите на Центарот за јавно здравје, Санитарниот инспекторат. Очекувам дека утре ќе имаме поточни информации“, изјави министерот Филипче.

    Денес во Велес има 43 активни случаи, а досега вкупно заболени се 96 лица. Освен во Велес, позитивни со КОВИД-19 се регистрирани и во населбата Чашка, засега четири случаи. Меѓу нив и возачот кој ги превезувал на работа и назад вработените, поради што се стравува дека бројот на заразени ќе се зголемува.

    „Во Велес има зголемен број на заболени, не можеме да прецизираме од овој или оној дел, туку секаде, целата територија е контаминирана“, изјави епидемиологот д-р Билјана Трајкова.

    Смирувачка порака од денешната седница на Општинскиот кризен штаб упати и градоначалникот Аце Коцевски.

    „Десетина новозаразени се од конфекцијата, од саботата таа не работи, освен 15-тина лица во администрација. До граѓаните упатувам апел, дека и покрај тоа што бројот на заболени се зголемува, нема место за паника и за вознемиреност. Епидемиолозите од Центарот за јавно здравје точно знаат од каде потекнува заразата, освен за два случаи. Сограѓаните нека се придржуваат до мерките, нека не ги лаже убавото време, нека носат маски и држат растојание и да не се групираат повеќе од двајца“, рече Коцевски.

    Зголемениот број на позитивни на КОВИД-19, предизвика и зголемување на бројот на лица во изолација. Според СВР Велес, вчера 35 лица од Велешко добиле решение за изолација и сега се вкупно 110, а ден претходно беа 75 лица.

    П. ПЕЧКОВ

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари