Жителите на Општина Карпош преку свои предлози можат да се вклучат во креирање на буџетот за 2021 година. Општината за таа намена креираше онлајн анкетен прашалник, преку кој сите жители на Карпош имаат можност да достават предлози, иницијативи и проекти за својата населба.
„Општинските сектори и одделенија ги подготвуваат буџетските програми за 2021 година. Сите предлози кои се реално остварливи и постои финансиска можност за нивна реализација, ќе бидат земени предвид и интегрирани во буџетските документи. Планираме да спроведеме и теренска анкета за да се добие уште појасна претстава за главните потреби и проблеми на граѓаните“, вели градоначалникот на Општина Карпош Стефан Богоев.
Оваа година, анкетниот прашалник е дополнет со прашање за пандемијата и предлози на жителите за потенцијални нови активности, мерки, кои реално можат да бидат преземени од општината за намалување на последиците од ковид-19.