САД и Европската унија, по одлуката за распуштање на Собранието, порачуваат дека ги поддржуваат сите партии и другите учесници во процесот за создавање услови за кредибилни избори, што подразбира прочистување на Избирачкиот список, спречување на каква било форма на заплашување или притисок врз гласачите, како и обезбедување на фер медиумско покривање.
Во заедничата изјава на амбасадорите Џес Бејли и на Аиво Орав се вели:
“Политичките лидери на оваа земја имаат одговорност пред своите граѓани да ја вратат земјата назад на евроатлантскиот пат преку спроведување на нивните политички договори и на итните реформски приоритети. Извесен прогрес е направен на овие полиња, но останува уште многу работа. Тоа е одговорност, не само на државните институции да подготват кредибилни избори, туку и на политичките партии. На 6 април се пропушти таква можност”.
Во изјавата стои дека “заедно со другите меѓународни партнери, ЕУ и САД ќе продолжат да поддржуваат демократски развој, што вклучува и избори. Ја поздравуваме работата на Државната изборна комисија, како и напорите на граѓанското општество во унапредување на оваа цел. Одблиску ќе ги следиме случувањата и ќе продолжиме да ги споделуваме нашите гледишта”.
Коментари