Монографијата за композиторот, инструменталист и диригент Кире Костов се промовираше синоќа во Битола, неговиот роден град каде што ги направил првите чекори во музиката. Костов почина во 2023 на 74 години. Автори на книгата се Снежана Атанасова-Чадиковска и Марко Коловски.
На промоцијата во Офицерскиот дом говореше неговата сопруга Кармен Костова, која е и издавач на монографијата, евоцирајќи спомени како лесно му одело да пишува песни. Костов има напишано околу 700 песни, а има и снимено толку минути во студијата на МРТВ и како диригент и како трубач.
„На Кире не му беше тешко само музика да пишува. Сѐдруо му беше тешко, сите административни работи кои требаше да ги работи не ги сакаше. Не пишуваше тешко. Единствено беше проблем пред да се создаде композиција, имаше поголема нервоза, тензија и ќе им речев на децата ‘тишина, ќе пишува татко ви песна’. По напишаната песна ќе се соберевме и сѐ беше лесно, едноставно“, рече Костова, пензионирана професорка по пијано.
Таа се потсети дека Кире Костов бил посебно горд што бил раководител на популарниот детски фестивал „Си-до“ во Битола. Во публиката на промоцијата беа и продуцентот на фестивалот Панде Димитровски и текстописците Валентин Соклевски и Петар Георгиев-Калица кој е и композитор, а детските песни кои ги напишал и денес се хитови. Дел од гостите беше и мајката на поп-ѕвездата Каролина Гочева, Светлана. Првите хитови за Гочева ги напиша Кире Костов, а неговата ќерка Ана пее придружен вокал во бендот на Каролина и е нејзина блиска пријателка.
„Новата детска песна не се роди случајно. Бевме на одмор со пријателите, музичарите Панде и Марга Татарчеви, децата се собираа околу нас и сакаа да ги пеат песните од фестивалите. Кире тогаш сфати дека децата пеат многу сериозни песни. Така се роди идејата да се создаде нов детски фестивал за кој се бараше име. Нашиот професор и композитор на детски песни Петар Сидовски го викаа Сидо, така Кире го крсти фестивалот и ја направи химната ‘Си-до’ за него“, рече Костова.
„Кога ќе се слушне стихот ‘Летај низ солзи мои, галебе мој тажен’, сфаќаме дека токму така изгледа и светот без маестро Костов“, рече водителката Љубица Ангелкова (Фото: СДК.МК)
Додаде дека во Македонија има многу заслужни луѓе за кои треба да се пишуваат монографии.
„Тие се наше национално богатство кое не смееме да го заборавиме, како што ги заборавивме Танцовиот и Камерниот оркестар на МТВ, хоровите. Кире знаеше да каже секогаш дека ‘музиката е нашиот идентитет, без музика сме никој и ништо’“, рече таа.
Монографијата е објавена во 300 промероци. Првиот примерок му беше подарен на битолскиот градоначалник Тони Коњановски. По Битола, промоција ќе се одржи на 11 ноември во Скопје, заедно со концерт на кој пеат пејачи кои соработувале со Костов. Тој ги напиша незаборавните македонски евергрини „Тајно моја“, „Кога те нема“, „Кој да ти каже“, „Што нè нема“ и други, како и дела од класичната и џез музика.
„Кога ќе се слушне стихот ‘Летај низ солзи мои, галебе мој тажен’, сфаќаме дека токму така изгледа и светот без маестро Костов“, рече водителката Љубица Ангелкова.
Песната „Охридски спомени“ од Костов ја испеа пејачот Сефедин Бајрамов, кој беше и музички соработник и семеен пријател на композиторот. Бајрамов рече дека песната му ги отворила вратите во кариерата.
Ж. ЗДРАВКОВСКА
