Големото Езеро на Пелистер привлекува туристи од повеќе земји кои често доаѓаат на своја режија откако за езерото читале на интернет. Деновиве на оваа атрактивна локација се искачи и семејството Лишен од Сингапур.
Младата брачна двојка дојде со петгодишниот син, кој пеш успеа заедно со родителите да се искачи до Езерото. Тие тргнаа како и други планинари и рекративци од Ниже Поле на надморска височина од 1.170 метри, а стасаа до Езерото на 2.218 мeетри надморска височина за четири и пол часа.
„Претходно бевме на највисоката планина на Балканот, Рила. Истражувавме на интернет која друга планина е специфична по својата убавина и треба да се посети. Откривме дека тоа е Пелистер. Локацијата ја најдовме преку гугл мапс. Допатувавме тука, имавме малку проблем за да го најадеме местото од каде треба да започне искачувањето, но на крај се снајдовме и уживавме во прекрасните пејсажи и убавото време“, рекоа Лишен.
Оваа патека преку Дебел Рид е класифицирана во средно тешки. Долга е 6 километри со денивелација од 1.048 метри. Ова е визуелно атрактивна патека која проаѓа наспроти Црвени Стени и има убава глетка кон таа страна на карпестите падини на Пелистер, како и неколку врвови на Баба кон Битола и Пелагониската Котлина.
Многумина битолчани кои не можат пеш да се искачат до Големото Езеро, одат со џипови.
Ж. ЗДРАВКОВСКА
