Народниот правобранител од понеделник, 17 септември, ќе отвори бесплатна телефонска линија 0800 54321, со цел да им помогне на граѓаните во остварувањето и заштитата на гласачкото право на слободно изразување на нивното мислење и став по однос на референдумското прашање, на референдумот за името на 30 септември.

Граѓаните од земјава и дијаспората на референдумот ќе треба да одговорат на рефендумското прашање, кое ќе гласи „Дали сте за членство во Европската унија и НАТО со прифаќање на Договорот за името меѓу Македонија и Грција“. Со овој Договор, потпишан на 17 јуни во грчкиот дел на Преспа, во селото Псарадес (Нивици), името на земјава ќе биде Република Северна Македонија за севкупна употреба, со признати македонски јазик и македонска националност.

Народниот правобранител Иџет Мемети  вели дека изјаснувањето на граѓаните и нивниот став по однос на ова референдумско прашање е нивна обврска и активен придонес за иднината на општеството. Тој истовремено потсетува и апелира до сите чинители во општеството, како што вели, да не ги попречуваат граѓаните во остварувањето на нивното загарантирано право на излегување и лично изјаснување. Ги повикува граѓаните секое евентуално влијание да го пријават.

Попречувањето на слободното излегување и изразување на своето мислење на референдумот, граѓаните можат и лично да го пријават во канцелариите на Народен правобранител во Скопје, Битола, Кичево, Куманово, Струмица, Тетово и Штип, секој ден, како и на денот на референдумот.