Десетмина демонстранти и четворица полицајци беа полесно повредени за време на вечерашните протести пред општина Битола, дознаваме неофицијално.

До повреди дојде за време на турканицата која настана меѓу демонстрантите и полицајците кога група битолчани се обидоа да го пробијат полицискиот кордон. Тогаш од општинската зграда излегоа полицајци со специјална опрема и ги отстранија демонстрантите кои беа насобрани пред полицискиот кордон. За да не дојде до поголеми инциденти демонстрантите ги кренаа рацете во знак дека немаат намера да вршат насилство врз полицијата и викаа дека во себе не носат предмети за напад, туку само јајца и телефони.

аматерска фотографија

И вечерва општинската зграда беше гаѓана со балони со зелена боја и јајца. Демонстрантите бараат оставка од битолскиот градоначалник Владимир Талески и од претседателот Ѓорге Иванов.

Вечерва организиран протест имаше во Велес. Во Скопје иако граѓанското здружение Протестирам најави дека ќе има пауза, стотина граѓани самоиницијативно протестираа низ центарот на градот и на спомениците им лепеа плакати.