Поранешниот премиер Никола Груевски тврди дека е жртва на политички прогон, откако Апелациониот суд денеска му ја потврди двегодишната затворска казна во предметот на СЈО „Тенк“. Зборувајќи на пауза од судењето за предметот на СЈО „Титаник“, каде е еден од обвинетите за злосторничко здружување и изборни нерегуларности, Груевски најави дека ќе ги искористи сите правни лекови за да ја оспори одлуката на Основниот суд Скопје 1, потврдена од Апелациониот суд.

„Станува збор за политички прогон, за политички монтиран процес, единствена промена е што одложија за по референдумот. Тоа е тоа. Сите правни лекови ќе се искористат. Има толку многу докази, што нема потреба од нови докази. Станува збор за обвинение дека сум влијаел да се купи возило, со цел, покрај другите и јас да сум се возел во него“, изјави Груевски.

• ГРУЕВСКИ НА МОБИЛЕН ЈА ПРОЧИТА ОДЛУКАТА НА АПЕЛАЦИЈА ЗА ЗАТВОРСКАТА КАЗНА, НА СУДЕЊЕ ЗА „ТИТАНИК“ ЗА ТЕШКИ ИЗБОРНИ НЕРЕГУЛАРНОСТИ
• 2 ГОДИНИ ЗАТВОР ЗА ГРУЕВСКИ, ПОТВРДИ АПЕЛАЦИОНИОТ СУД

Лице осудено со правосилна пресуда на над една година затвор, според законот, може да бара до Врховниот суд преиспитување на правосилната пресуда со вонреден правен лек. Но, Врховниот суд, односно петчлениот кривичен совет каде на чело е Јово Вангеловски, не може да одлучи веднаш, туку треба првин да побара мислење од Јавниот обвинител на Македонија Љубомир Јовески.

Праксата, велат во Врховниот суд, е во вакви случаи процедурата да трае и до четири па и пет месеци. Ако во меѓувреме нема некоја причина од сериозни здравствени проблеми, одлуката за извршување на затворската пресуда се спроведува веднаш, без оглед дали осуденото лице се обраќа до Врховниот суд со вонреден правен лек.

Затворската казна за Груевски е за незаконито влијание на обвинетиот Груевски за набавката на луксузниот „мерцедес С-600 гард“, кое тие не можеле да го одбијат зашто им бил шеф, премиер.

С. К. ДЕЛЕВСКА