ВМРО-ДПМНЕ сè уште не знае дали ќе го бојкотира референдумот за Договорот со Грција на 30 септември. Генералниот секретар Игор Јанушев на денешната прес -конференција, одговарајќи на новинарско прашање, рече дека во наредните денови ќе биде донесен официјален партиски став.

„По донесување на официјален став на раководството на партијата јавноста ќе биде информирана. Тоа ќе биде во наредните денови“, рече Јанушев, кој изјавите на дел од членството на партијата за бојкотирање на референдумот ги оцени како демократско право.

Јанушев не сакаше да одговори дали ВМРО-ДПМНЕ ќе прифати уставни измени доколку биде референдумот успешен односно ако биде постигнат цензусот од 50 отсто плус еден и мнозинството граѓани гласаат ’за‘.

„Да бевме СДСМ ќе се нафатевме да одговараме на хипотетички прашање, но не сме. Да почекаме како ќе се одвиваат работите“, додаде Јанушев.

Јанушев повтори дека со референдумското прашање кое е двосмислено и се крши Законот за референдум и дека Зоран Заев и СДСМ насила сакаат да го протуркаат.