Анализата на наодите на стручните комисии за давање наод, оцена и мислење за потребата од помош и нега од друго лице, спроведена од Министерството за здравство, покажа дека проблемот со честото поднесување документи не произлегува од потребата рокот да биде продолжен, туку од неправилна примена на постоечкиот Правилник, велат од Министерството.
Министерот за здравство во Алиу на 11 јуни кажа дека државата губи повеќе од 2 милиона евра годишно со тоа што непотребно се враќаат пациентите кои имаат траен инвалидитет преку комисиите во Министерството за социјална политика, демографија и млади. Тој тогаш кажа дека дека е направена работна група помеѓу Министерството за социјална политика и Министерството за здравство и дека после средбите и после анализите од работната група ќе излезат со јасна предвидена динамика за тие комисии, бидејќи навистина е товар и економски и здравствено.
Алиу е министер во заминување, а предлог за нов минстер е Сашо Клековски. Новиот состав на Владата треба да се гласа денеска во Собранието.
Согласно Правилникот, како што ни рекоа од Министерството за здравство, одреден број дијагнози се квалификувани како трајни промени на здравствената состојба кај пациентите, за кои закажувањето контролен преглед по определен рок (6, 12 или 24 месеци) нема правна основа. И покрај тоа, анализата утврди дека кај значителен процент од случаите со позитивни одлуки за трајни промени, сепак бил определен контролен преглед.
„Врз основа на добиените наоди од анализата, Министерството за здравство достави известување во електронска и хартиена форма до членовите на стручните комисии и до здравствените установи каде се обавуваат овие прегледи, за правилна и доследна примена на Правилникот, со цел да не се бара повторно докажување на состојбата/болеста и периодични контроли за пациентите кои боледуваат од овие дијагнози. Известување е испратено и до матичните лекари, во кое се укажа дека при закажување на преглед на пациент за наод за потребата од помош и нега од друго лице, нема потреба од конзилијарно мислење (извештај со потпис од тројца специјалисти). Оваа практика се провлекувала со години, иако не е предвидена во Правилникот. Заклучокот е дека не се зборува за потреба од продолжување на рокот, туку за целосно укинување на непотребните контроли и непропишаните административни бариери, што директно ја адресира загриженоста на граѓаните за честото и непотребно поднесување документи. На овој начин би се растоварил и електронскиот систем за закажување, како за пациентите за преглед пред комисиите, така и за испитувањата кои ги предвидува Правилникот за овие дијагнози“, ни рекоа од Министерството.
- ТРАЈНИТЕ ИНВАЛИДИ МОРА ДА ДОКАЖУВААТ НА СЕКОИ 6 МЕСЕЦИ ДЕКА НЕ СЕ РАБОТОСПОСОБНИ, ЗА КОМИСИИТЕ ДА ЗЕМААТ ПО 2 МИЛИОНИ ЕВРА ЗА ХОНОРАРИ ГОДИШНО
- НА ЖЕНА СО МУЛТИПЛЕКС СКЛЕРОЗА Ѝ Е УКИНАТА ИНВАЛИДСКАТА ПЕНЗИЈА, ФОНДОТ ЈА ТУЖИ И БАРА ДА ВРАТИ ВКУПНО 7.000 ЕВРА ДОБИЕНИ ЗА 2 ГОДИНИ
Заменик-министерот за социјална политика, Ѓоко Велковски, кој е предлог за нов министер, во интервју за ТВ Сител кажа дека во 2019 е направена една измена на Законот каде што до тогаш постоело трајна туѓа нега и мобилност. Трајна бидејќи одредени инвалидности медицински не може да се надминат и тие се трајни.
- МИ РЕКОА „АЈ ПООДИ МАЛКУ“ И ПАК МЕ ОДБИЈА ЗА ПОМОШ ЗА ТУЃА НЕГА, ВЕЛИ СКОПЈАНЕЦОТ ВАСЕ СТОЈАНОВСКИ, КОЈ ИМА ПОКУСА НОГА ЗА 10 САНТИМЕТРИ, НЕМА КОЛК И ИМА МНОГУ СЕРИОЗНИ БОЛЕСТИ
- ЗА ДА НЕ МУ ДАДЕ 5.000 ДЕНАРИ ЗА ТУЃА НЕГА, ДРЖАВАТА ИЗБЕГНУВА ЗДРАВСТВЕН ПРЕГЛЕД НА СКОПЈАНЕЦ СО НОГА ПОКУСА ЗА 10 САНТИМЕТРИ И ДУЗИНА ДРУГИ БОЛЕСТИ
„Меѓутоа некој тогаш сметал да ги измени правилниците и да на секои независно 6, 12 или 24 месеци, зависно колку е дадено решението, тие да се појавуваат повторно на прегледи. Тука имаат, морам да кажам, и трошоци за сето тоа треба да се плати, одредена сума за тој преглед, за конзилијарното мислење и така натака. Така што, успеав во овој период и да се сретнам со голем број од организациите токму на лицата со инвалидност, и националните, меѓутоа и сите други организации и поголеми и помали, независно. Сите се добредојдени со совети, така што ова е една од мерките коишто ќе ја преземеме при првата измена на Законот за социјална заштита, да ги промениме да овие коишто имаат траен инвалидитет и тоа е медицински докажан, да овие луѓе имаат траен наод за мобилност или туѓа нега, а потоа секој ќе си има контроли и проверки од страна на Министерството, комисија коишто ќе си ги проверува нели на одреден период дека сѐ е во ред’, кажа Велковски на 11 јули.
Б. НЕСТОРОСКА
