Околу 72% од возрасните во Европската Унија се целосно вакцинирани против ковид-19, но ниската стапка на имунизација во некои источни членки се заканува да ги преполни тамошните болници среде ширењето на попреносливиот делта сој.
Бугарија и Романија драматично заостануваат зад остатокот на блокот, со само 22%, односно 35% целосно вакцинирано возрасно население. Брзото зголемување на бројот на новозаразени ги натера властите да ги заострат рестрикциите во двете земји, во услови кога држави како Франција, Шпанија, Данска и Португалија веќе го надминаа прагот од 80% вакцинирани и полека ги укинуваат коронамерките.
Еврокомесарката за здравство Стела Кирјакидес вели дека мора итно да се реагира за да се надминат загрижувачките разлики во вакцинирањето. Словачка, Хрватска и Летонија вакцинираа околу 50% од своите жители.
Шефицата на одделот за интензивна нега на Институтот за пулмологија во Букурешт, Геновева Кадар, вели дека веќе немаат слободни кревети и дека 98% од пациентите се невакцинирани.
„Во споредба со претходните бранови, луѓето сега доаѓаат со посериозни симптоми на болеста и голем дел од нив се на помлада возраст. Многу брзо завршуваат на респиратор и прогнозите им се лоши“, вели Кадар.
Романија вчера регистрираше над 11.000 нови случаи на зараза, што е најголема дневна бројка од почетокот на пандемијата. До неделата биле зафатени 1.220 од 1.239 кревети на интензивна нега, со колку што располагаат романските болници.
Во соседната Бугарија, 23% луѓе велат дека не сакаат да се вакцинираат, што во остатокот од блокот изнесува 9%, според истражувањето на „Еуробарометар“.
Експертите сметаат дека скепсата кон вакцините во делови од Европа би можела да ги поткопа напорите за завршување на пандемијата на континентот.
