Нуклеарната агенција на ОН повика на итен прекин на секоја воена акција во близина на украинската нуклеарна централа во Запорожје, предупредувајќи на „многу реален ризик од нуклеарна катастрофа“. Шефот на МААЕ, Рафаел Маријано Гроси, рече дека е „екстремно загрижен“ од извештаите за гранатирање на најголемата европска нуклеарна централа, откако Украина соопшти дека делови од објектот биле „сериозно оштетени“ од руските воени напади.

Русија ја заплени фабриката во март. Ги задржа украинските вработени, но Киев ги обвинува руските сили дека истрелуваат ракети врз цивилни области од локацијата, користејќи „терористичка тактика“.

Вчерашните напади го нагласуваат „реалниот ризик од нуклеарна катастрофа што може да го загрози јавното здравје и животната средина во Украина и пошироко“, рече Гроси во изјавата. „Секоја воена огнена моќ насочена кон или од објектот би претставувала играње со оган, со потенцијално катастрофални последици“, додаде тој. Украинскиот персонал мора да може да ги извршува своите важни задачи „без закани и притисок“, рече тој, додавајќи дека на МААЕ треба да ѝ се дозволи да обезбеди техничка поддршка.

„Заради заштита на луѓето во Украина и на други места од потенцијална нуклеарна несреќа, сите ние мора да ги оставиме настрана нашите разлики и да дејствуваме сега. МААЕ е подготвена“, рече Гроси, неколку дена откако изјави дека централата е „целосно вон контрола“.

Операторот на централата Запорожје рече дека руските ракетни напади принудиле затворање на една „енергетска единица“, додавајќи дека постои ризик од радиоактивно истекување. Нападите „предизвикаа сериозен ризик за безбедното работење на централата“, објави операторот Енерхоатом на Телеграм.

Москва соопшти дека Украина го извршила нападот.