Над 500 учебници на македонски јазик од прво до петто одделение по математика и природни науки деновиве ќе бидат донирани на околу 250 учениците од Пустец, Албанија, кои учат во двете основни и едно средно училиште. Децата од овој крај сакаат да учат од книги напишани на македонски јазик, но проблемот со недостаток на учебници со години се провлекува низ образовниот процес. Според законската регулатива во Албанија, учениците каде е признаено македонското малцинство имаат право на учење на мајчин јазик од прво до петто одделение, но треба сами да си ги набават учебници.

„Македонското малцинството таму е признаено и ние како држава, полититички партии, бизнис заедницата треба да им помогнеме на тие наши деца таму, кои што се и во сиромашни краеви и немаат можност да дојдат до книги за да на некој начин им биде поблизок македонскиот јазик. Сакаме да им помогнеме да бидат што поблиску до својата матична земја“, вели Зоран Димитровски, заменик-министер во Министерство за локална самоуправа и генерален секретар на Демократски сојуз, партија која заедно со Либерално-демократската партија ги донираат учебниците.

Димитровски вели дека Македонците од овој крај честопати биле мета на бугарска пропаганда за ширење на бугарското национално чувство преку нудење учебници, стипендии, инфраструктурни проекти, пасоши.

„Проблем е што во сите овие средини каде живеат Македонци, каде е признато македонското малцинство и каде што има училишта, одат бугарски високи официјални лица и на најразлични начини се обидуваат да влијаат нашите да ги направат Бугари. Истото се случило и пред некој месец, кога им биле понудени учебници на бугарски јазик. Ние треба да го искористиме моментот, и како држава и како индивидуалци и како бизнис заедница и како политички партии, дека тоа малцинство таму не сака да биде ништо друго освен Македонци“, вели Димитровски.

Претседателот на Демократски сојуз Павле Трајанов апелира Владата и надлежните министерства да ги следат ваквите состојби, бидејќи се работи за мали средства кои може се да обезбедат со грантови.

„Бугарите во тој дел се многу активни, нудат помош, книги на бугарски јазик и слично. Ние како држава, каде имаме Македонци кои се признаени и можат да го користат мајчиниот јазик и да учат на македонски, многу малку водиме сметка за тоа. Се работи за однос кон нашите иселеници“, вели Трајанов.

С. ВРЕНЦОВСКА