Кривична одговорност за надлежните за загадувањето на водоводот во Гостивар што предизвика труење на над 1.500 жители и е прогласена епидемија ќе поднесе Обвинителството, а што се однесува до моралната, тука ја има од првиот човек во локалната власт на Гостивар па сите надолу, кажа премиерот Христијан Мицкоски, при денешната посета на Велес. Рече дека утрово бил брифиран од Институтот за јавно здравје (ИЈЗ) оти резултатите од квалитетот на водата за пиење во Гостивар се готови и се доставени до Обвинителството.

Но, Основното јавно обвинителство соопшти дека преземаат истражни дејствија за прибирање докази и дека извештајот од Институтот за јавно здравје сѐ уште не е доставен до нив.

„Сите прибрани докази до овој момент, како и доказите кои допрва се очекува да бидат доставени се анализираат за да се утврди состојбата од која ќе произлезе правна квалификација на евентуално сторено кривично дело и идентификација на сторителите. Постапката се уште е во фаза на предистрага која е тајна. Веднаш по утврдување на сите околности и донесување на соодветна јавнообвинителска одлука јавноста ќе биде запознаена“, вели ОЈО.

Претходно, градоначалникот на Гостивар, Валбон Лимани, објави дека директорката и дел од раководството што е одговорно за водоводот се суспендирани од функциите, но рече дека тој не чувствува морална одговорност.

Од вчера е прогласена епидемија во Гостивар, откако на 17 јули водата беше забранета за пиење и друга употреба. Со надзорот е утврдено дека во главниот цевковод на водоводната мрежа, на диво, без одобрение поставена е пумпа која директно вбризгува вода од реката Вардар во овој водоснабдителен систем

• ЌЕ СЕ ПРОГЛАСИ ЕПИДЕМИЈА НА ЗАРАЗНА БОЛЕСТ ВО ГОСТИВАР, ВОДАТА ДА НЕ СЕ КОРИСТИ ЗА ГОТВЕЊЕ И МИЕЊЕ, РЕКОА ОД ИНСТИТУТОТ ЗА ЈАВНО ЗДРАВЈЕ

„Обвинителот треба да излезе со квалификација на делото. Таму морална одговорност треба да понесат од прв до последен, од градоначалникот сè надолу. Како Влада преземавме чекори за обезбедување 50 илјади литри вода флаширана за пиење, за гостиварци. Така ќе биде секој нареден ден. Денес ќе се дистрибуираат три шлепери или 60.000 литри вода. Важно е водата од чешмите во Гостивар да се користи за технички потреби, бидејќи согласно препораките на Агенцијата за храна и ветеринартсво (АХВ) сега не е можно. Ова е што го работи Владата е дел од обврските на локалната самоуправа. Сега Комуналното во Гостивар треба да пристапи кон прочистување на водоводот, хлорирање за да може граѓаните да ја користат за хигиена“, кажа  Мицкоски.

• ВЛАДЕЈАЧКАТА ВМРО-ДПМНЕ ЈА ОБВИНИ ЛОКАЛНАТА ВЛАСТ ЗА ТРУЕЊЕТО ВО ГОСТИВАР И БАРА ОД ИНСТИТУЦИИТЕ ДА ГО ИСТРАЖАТ

• НЕ МОЖЕ ДА Е ОД ХРАНА ТРУЕЊЕТО НА НАД 1.000 ЖИТЕЛИ НА ГОСТИВАР, РЕЧЕ МИНИСТЕРОТ ЗА ЗДРАВСТВО КЛЕКОВСКИ

• ЗАБРАНЕТА Е ЗА ПИЕЊЕ ВОДАТА ВО ГОСТИВАР ОТИ ГРАДСКИОТ ВОДОВОД НА ДИВО СТАВИЛ ПУМПА ЗА ДА ЦРПИ ОД ВАРДАР, ЗАТРУЕНИ НАД 1.200 ЖИТЕЛИ

Се очекува надзорот кој го потпишал извештајот за реализираната реконструкција на водоводониот систем на Гостивар, од село Вруток до филтер-станицата, со средства од Владата и Швајцарската Агенција за развој, да се произнесе дали таа бил согласно процедурите и постапките за градба. Реконструкцијата била изведена во 2024 година.

Министерот за одбрана Владо Мисајловски, кој беше во одвоена посета на Велес, кажа дека до нив нема стигнато барање за помош од армијата во врска со епидемијата  во Гостивар.

„До денес, до армијата нема стигнато било какво барање за помош во случајот со прогласената епидемија во Гостивар. Доколку било кој почувствува потреба и се јави, локалната самоуправа, граѓаните, војската е тука да помогне, на било кој начин. Но прво треба да ја побараат“, рече Мисајловски, кој беше во Велес да изврши увид во реконструкцијата на војнички павилјон.

П. ПЕЧКОВ