Вработените во наредниве денови ќе добијат плата и нема да дозволиме скопјани да останат без јавен превоз, велат од ЈСП „Скопје“ откако денеска возачите се заканија дека нема да возат.
Од претпријатието проблемот со доцнењето на платата го посочуваат во тоа што централната власт и дел од општините не платиле за организиран превоз за одредени категории граѓани.
„Со парите за организиран превоз за одредени категории патници се исплаќа платата за вработените во ЈСП. Очекуваме дека час поскоро ќе ги подмират минатогодишните долгови и тековните обврски како не би се довела во прашање редовната работа на претпријатието“, велат од ЈСП.
Оттаму додаваат дека и покрај економската криза и постојаниот раст на цената на горивата од претпријатието Скопје нема да остане без јавен превоз, ниту ќе се покачи цената на билетите.
А. АНТЕВСКА
