СО ЗАТВОРАЊЕТО НА ЕДИНСТВЕНАТА ФАБРИКА ВАГОНИТЕ ЌЕ ПОПРАВААТ ВО СТРАНСТВО И МНОГУ ПОСКАПО, ПРЕДУПРЕДИЈА ВРАБОТЕНИТЕ ОД „КОЛСКА“

    СО ЗАТВОРАЊЕТО НА ЕДИНСТВЕНАТА ФАБРИКА ВАГОНИТЕ ЌЕ ПОПРАВААТ ВО СТРАНСТВО И МНОГУ ПОСКАПО, ПРЕДУПРЕДИЈА ВРАБОТЕНИТЕ ОД „КОЛСКА“Работниците од единствената фабрика која во земјава врши поправка на патничките и товарни вагони денеска протестираа пред УЈП во Велес. (Фото: СДК.МК)

    Претпладнево, два часа вработените од фабриката за шински возила „Колска“ протестираа пред канцелариите на УЈП во Велес. Тие на овој начин го изразија незадоволството што УЈП решила присилно да го наплати долгот од 37 милиони денари, со продажба на дел од имотот на фабриката. Вработените предупредуваат дека со затворањето на „Колска“, како единствена фабрика која во земјава врши поправка на патничките и товарни вагони, за истата намена во странство ќе се плаќаат неколку пати повисоки цени за истите услуги.

    „Свесно се оди на затворање на ‘Колска’. Со оваа продажба на парче по парче на имотот тоа ќе се случи, а ние вработените ќе си одиме дома. Со нашето затворање, колите- вагоните ќе се носат на поправка во Србија или Бугарија, за далеку повисоки цени. Тоа ќе биде излез на девизи и 80 вработени без работа, под биро“, рече Тони Арсовски, претседател на основната синдикална организација на ССМ во „Колска“.

    Вчер, ССМ пријавил до Државниот инспекторат за труд и побарал вонреден инспекциски надзор во „Колска“, оти се исплаќала плата од 15.200 денари што е под законскиот минимум од 18.000 денари.

    „Никој не смее да го крчми работничкиот имот кој тие го создавале со години. Застануваме и пред државата и пред УЈП и нема да дозволиме. Се надевам дека денес ќе оствариме средба со претседателот на судот во Велес,за да најдеме рамка како да може фабриката да има средства за да работи, да се исплатуваат плати, да се набавува репроматеријал за работа, да има струја и вода. Ако Владата сака да ја затвори оваа единствена фабрика за шински возила во земјава и да гради туѓи економии со македонски пари, да поправа вагони во странство, се лаже“, кажа Дарко Димовски претседател на ССМ.

    На протестот му се приклучија и поранешни вработени, сега пензионери. Се сеќаваат дека и „плавиот воз“ на Тито во 1970 година бил репариран во „Колска“.

    „Иако бевме фабрика од Македонија, кај нас носеа вагони за поправка и од Хрватска, Србија, БиХ. Бевме најквалитетни со работата. Да се затвори фабриката денес, е најголем срам и штета и по градот и по државата“, кажа пензионерот Јордан Ацков.

    Фабриката за шински возила во Велес е меѓу најстарите на Балканот, изградена 1916, од Германците во периодот на Првата светска војна, во тоа време била работилница. Тие ја изградиле за нивни потреби, за поправка на возовите кои сообраќале кон Солун и кон Лерин.

    „Колска“ за 106 години работа зад себе има оставено силен траг во македонската економија и железница. Во минатото фабриката имала поголем обем на работа и продукција, отколку последните години. Освен репарирањето на вагоните и локомотивите на МЖ, изведени се повеќе крупни работи. Се работело во изградбата на Фени во Кавадарци, конструкцијата на НА-МА во центарот на Струга, мостот на Бошава. Изработени се железните садови за железарите во Скопје, Смедеревска Паланка и Ниш. Деловниот воз кој сообраќаше од Скопје за Белград и обратно го изработиле вработените од „Колска“, исто како и силосите на фабриката за вар во Превалец.

    П. ПЕЧКОВ

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира