„Крајот на времето“ на Милчо Манчевски освoи награда на филмскиот фестивал Аспен Шортфест 2017 во САД, каде што на 5 април ја имаше и светската премиера. Новиот експериментален краток филм на Манчевски во кубанско-американска копродукција, ја освои престижната награда Елен која носи и 2,500 долари.
Наградата е востановена во чест на Елен Кохнер Хант, основач и поранешна директорка на фестивалот во Аспен, Колорадо, еден од најреномираните фестивали на краткометражен филм во светот кои се квалификуваат за наградата Оскар. Наградата Елен е дел од престижните официјални признанија на фестивалот, а според организаторите, се доделува „на филм кој го отелотворува духот на филмската селекција на Аспен од 1976 до 1995“.
Годишеното издание на фестивалот во Аспен заврши синоќа.
Шестминутниот „Крајот на времето“ е опишан како експериментален филм „за оној хипнотизирачки миг во еден обичен, скромен вторник кога човек сфаќа дека времето запрело и светот е вшмукан во една единствена насмевка“.
„’Крајот на времето’ е филм кој може комотно да се претстави во музеј или галерија наместо во кино-сала. Во него продолжувам да ја истражувам крстосницата каде што вистината и прикаската се вкрстуваат, преклопуваат и сукобуваат; овој пат на минималистички начин“, вели Манчевски.
Филмот е снимен во Сан Антонио де лос бањос на Куба, а постпродукцијата во Њујорк и Македонија. Ова е една од првите американско-кубански копродукции, која започна пред неодамнешното затоплување на односите меѓу двете земји. Манчевски беше еден од првите уметници од САД што беа вклучени во културната дипломатија, тој беше ангажиран за професор на Државната филмска академија во Хавана, предаваше на постдипломците по филмска режија, меѓународна група студенти од целиот свет, а истовремено го сними и „Крајот на времето“.
Македонската Агенција за филм и македонското Министерство за култура не учествуваат во овој проект.
Директор на фотографија е Ален Лопез Мартинез, монтажер Кристина Поженел, автор на музиката и тонскиот дизајн е Игор Василев Новоградска, визуелните ефекти се на Мишо Ристов и Рекс, а колор грејдингот на Мајкл Двас.
Долгометражните филмови на Манчевски се добитници на бројни меѓународни награди, меѓу кои и Златниот лав во Венеција, номинација за Оскар, Давид ди Донатело, Златна бубачка, ФИПРЕСЦИ, УНЕСКО. Неговите кратки форми исто така имаат добиено награда на Ем-Ти-Ви за видео, награди за експриментален филм, награди за спотовите „Македонија вечна“. „Њујорк тајмс“ го вброи неговиот филм „Пред дождот“ во 1.000 најдобри филмови на сите времиња. Манчевски има режирано и на серијата „Жица“ (The Wire) за Ејч-Би-О.
