ДЕКОРИРАНИТЕ ИЗЛОЗИ СЕ НАШ ПОДАРОК ЗА СКОПЈЕ, ВЕЛАТ ОД ТИМОТ НА ФЕСТИВАЛОТ „НЕДЕЛА НА ИЗЛОЗИ“

    ДЕКОРИРАНИТЕ ИЗЛОЗИ СЕ НАШ ПОДАРОК ЗА СКОПЈЕ, ВЕЛАТ ОД ТИМОТ НА ФЕСТИВАЛОТ „НЕДЕЛА НА ИЗЛОЗИ“Излогот на Театарот на деца и младинци е еден од излозите на кој работеа дизајнери и архитекти на првото издание на фестивалот „Недела на излозите“, кој од синоќа до 17 декември се одржува во строгиот центар на Скопје. (Фото: К. Попов)

    Фрактално чоколадо, стихови од македонскиот бенд „Бернајс пропаганда“, часовници закачени на пирамиди и подвижни полици се само мал дел од декорот во излозите на шест продавници на улица Македонија и на Театарот за деца и младинци, кои ги разубавија 25 млади дизајнери и архитекти. Станува збор за првото издание на фестивалот „Недела на излозите“, кој од синоќа до 17 декември се одржува во строгиот центар на Скопје.

    Основачи на фестивалот се модниот истражувач Кристина Глигоровска, архитектката Искра Јанковска-Михајловска и модната креаторка и професорка Лидија Георгиева, а е поддржан од Амбасадата на Швајцарија.

    Швајцарката амбасадорка Сибил Зутер Техада доби благодарница од основачите на „Недела на излозите“: Искра Јанковска-Михајловска, Кристина Глигоровска и Лидија Георгиева. (Фото: К. Попов)

    Преуредени се излозите на книжарницата „Култура“, часовничарот „Хронометар“, Театарот за деца и младинци, книжарницата „Литература.мк“, продавницата за чоколадо на швајцарскиот бренд „Линд“, и пасажот до книжарницата „Литература.мк.

    „Има едно правило кое вели дека излозите изгледаат најубаво во дождлива вечер. Огромна е радоста од реализацијата на проектот кој на почетокот изгледаше како недофатна идеја, буквално напишана на еден лист хартија во еден скопски бар. Прашањето кое нѐ мачеше беше како да ги споиме модните дизајнери и архитекти  и од нивната соработка да произлезат уметнички дела. Она што прво ни падна на ум се излозите кои се всушност една отворена галерија на еден модерен град. Среќни сме што успеавме да ги донесеме светските трендови во оваа област. Сметаме дека излозите се репер за естетската култура која постои во градот. Среќни сме дека ја подигнавме свеста дека излозите практично се уметност“, рече Глигоровска на отворање.

    „Пасажот е поклон за цел град, чувајте го. Намерно го оставивме получист, полувалкан за да го препознаат“, рече Георгиева. (Фото: К. Попов)

    Амбасадорката Сибил Зутер Техада рече дека Швајацарија уште од 2017 ги поддржува локалните уметници и културата, и дека нивна цел е да се создаде позитивна клима за развој на силен и независен културен сектор и да поттикнат професионализам, креативност и слобода на уметничко изразување.

    „Иновативниот проект ‘Недела на излозите‘ им овозоможи на учесниците да стекнат непроцеливо уметничко знаење и искуство пренесено од реномирани ментори во секоја област“, додаде амбасадорката.

    Архитектката Искра Јанковска-Михајловска рече дека проектот е поддржан и од Технолошко-металуршкиот факултет во Скопје и од Архитектонскиот факултет во Скопје, и дека студентите поми нале два циклуса. Во текот на пролетта бил едукативниот циклус со мастер класовите и работилниците, а есенва работеле на реализација на излозите.

    „За нас најважно беше што овие млади професионалци, архитектите и модните дизајнери, ги измешаа вештините. Тие секако работат во полето на уметноста и имаат различни видувања на истите нешта. Беше одлично искуство и голем предизвик да се спојат заедно. Очекуваме дека домаќините во нивните локали ќе ја препознаат нивната уметничка вредност и дека најверојатно ќе ги ангажираат повторно. Ние како поискусни професионалци сакавме да создадеме наша конукренција, сметаме дека конkуренцијата ќе го подигне нивото и квалитетот на тоа што ќе го добиете како производ“, кажа Јанковска-Михајловска.

    Излогот на продавницата за чоколадо на швајцарскиот бренд „Линд“.(Фото: K. Попов)

    Дизајнерката Лидија Георгиева рече дека тимот, соработниците и студентите од сѐ срце, со голем ентузијазам и голема љубов работеле на проектот.

    „Ова е подарок за градот, тоа е идејата. Сакајте го како што го сакаме ние, уживајте во делата на младите студенти и професионалци кои сега доаѓаат, прочитајте ги нивните имиња. Пасажот е поклон за цел град, чувајте го. Намерно го оставивме получист, полувалкан за да го препознаат“, рече  Георгиева.

    Партнери на првото издание на фестивалот покрај двата факултета се и Центарот за дизајн и иновации „Јавна Соба“ во Скопје и „МладиХаб“, односно Канцеларијата на Претседателот (кај Рекорд). „МладиХаб“  ќе служи како информативна точка за време на фестивалот

    Б. НЕСТОРОСКА

     

     

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари