Не е точно дека на пилотот на авионот „цесна“ што вчера се урна кај планинскиот врв Солунска Глава не му било дозволено да слета на Скопскиот аеродром, велат од М-НАВ. Информациите кои беа објавени во бугарски и домашни медиуми дека не била дадена согласност за слетување во Скопје, оттаму ги оценуваат како дезинформации и шпекулации.
„На пилотот на авионот од типот ‘цесна П210Н’ му беше дадено одобрување за слетување на Скопскиот аеродром, но сепак, истиот се предомисли и го продолжил патот кон Софија по што се урна над Солунска Глава. Со оглед дека се работи за немил настан и во интерес на истрагата и од почит кон роднините на загинатите апелираме да не се шират на разни дезинформации и шпекулации“, велат од М-НАВ.
- СЕ ВРШИ ОБДУКЦИЈА НА ТЕЛАТА НА ЗАГИНАТИТЕ ПАТНИЦИ ВО АВИОНСКАТА НЕСРЕЌА КАЈ СОЛУНСКА ГЛАВА
- ПРОНАЈДЕНИ ОСТАТОЦИТЕ ОД АВИОНОТ КОЈ СЕ УРНА КАЈ СОЛУНСКА ГЛАВА, ЗАГИНА ЧЕТВОРОЧЛЕНО СЕМЕЈСТВО
- МАЛ АВИОН ИСЧЕЗНА ОД РАДАРОТ КАЈ СОЛУНСКА ГЛАВА
Во авионската несреќа загинаа четири патници, мајка, татко и две деца, државјани на Бугарија.
Како што вчера изјавија од М-НАВ, авионот полетал од охридскиот аеродром за Софија. Поради лошите временски услови побарал да слета на Скопскиот аеродром, но потоа се премислил и го продолжил летот кон Софија. Во 16.16 часот на 26 километри јужно од Скопје, се губи од радарот. Пред да се изгуби од радарот последната комуникација со пилотот била: „Јака турбуленција“.
А. АНТЕВСКА
