Министерката за надворешни работи на Бугарија Теодора Генчовска најавува дипломатски мерки против говорот на омраза, по протестите коишто се одржуваат во Скопје.

„Работа на македонските власти е да го запрат јазикот на омраза. Како што знаете, одамна повикуваме на малку трпение Македонците да си ја завршат работата. Тие само треба да го убедат своето општество што да прави во врска со предлогот на француското претседателство со ЕУ. Ќе преземеме дипломатски мерки против говорот на омраза – повикување на привремениот претставник на амбасадата, предавање протестна нота и слично“, вели Генчовска.

Одговарајќи на прашањето дали се подготвени протоколите односно записникот од вториот состанок на Мешовитата меѓувладина комисија за исполнување на Договорот за добрососедство со Бугарија, кои се дел од предлогот на француското претседателство со Советот на ЕУ за почеток на преговорите на Македонија за членство во Унијата, Генчовска рече:

„Имаме џентлменски договор со министерот за надворешни работи на Северна Македонија, Бујар Османи, пред некој ден дека протоколите се затворени. Се надевам дека стои на зборот. Јас ќе стојам на моето ветување – нема да ги отвораме текстовите. Бидете сигурни дека тие целосно го гарантираат националниот интерес и целосно ја почитуваат одлуката на Народното собрание“.

Министерот Османи на 1 јули во Скопје изјави дека протоколот е усогласен во МНР, но треба да го одобри Владата, којашто ќе го разгледа во рамки на целиот пакет.

„Пакетот има европска и билатерална компонента. Билатералната компонента е протоколот и тој веќе не е во европскиот пакет, туку е билатерален со Република Бугарија, но е дел од овој процес за Бугарија да даде согласност за пакетот“, изјави Османи на прес-конференција во Владата по средбата на владината коалиција.

Вицепремиерот за евроинтеграции, Бојан Маричиќ, пак, денеска изјави дека е прашање на часови или денови додека да се усогласи протоколот со Бугарија.

Од моментот кога беше објавен првичниот француски предлог за надминување на бугарската блокада на Македонија во ЕУ, ткн. Протокол односно записникот од вториот состанок на Мешовитата меѓувладина комисија стана една од клучните точки во анализите за (не)прифатливоста на предлогот.

Во последната верзија на францускиот предлог која ја објави и македонската влада, Протоколот повеќе не се споменува директно во Преговарачката рамка. На негово место сега се зборува за „годишни прегледи и мерки за ефективна имплементација според Членот 12“. Членот 12 алудира на Договорот за добрососедство кој Северна Македонија и Бугарија го потпишаа во 2017 година. Во недостаток на официјален документ од македонска страна, ДВ го објави Протоколот кој бугарската министерка за надворешни работи Генчовска го испрати до Комисијата за надворешна политика во Софија, во пресрет на нејзиниот настап пред истата на 23 јуни годинава.

Како што пренесува „24 часа“, Генчовска смета дека со процедурите кои се во тек во Скопје, земјата очигледно нема интерес да се забрза процесот, поради што многу земји-членки на ЕУ веќе зборуваат за поделба на преговорите со Северна Македонија и Албанија.