Шарените револуционери пред Собрание ја рецитираа „Молитва“ од Блаже Конески. Демонстрантика од бината на микрофон ја рецитираше, а и многумина од насобраните демонстранти наизуст во исто време со неа ги кажуваа стиховите.

Спаси ме Боже, од болните луѓе
што се накажани,
та не се криви,
нивната злоба умерено суди ја,
самите од неа одвај се живи.

Тие се мислаи и повикани да водат
како Мојсија и другите пророци,
а самите не можат да се ослободат
и влечат по себе ситни пороци.

Дај Господе, што помалку очите да
им ги бодам,
штом тие лево ќе фатат,
јас десно да одам.

Пред Собранието вечерва демонстрантите ги има двапати повеќе отколку претходните денови и полни се со енергија. По „Молитва“ тие со двата чатала го боеја Собранието.

На пат кон Собранието демонстрантите фрлија тазе боја на Министерството за правда, а потоа и на празната канцеларија на претседателот Ѓорге Иванов во Центар. Демонстрантите се задржаа пред канцеларијата и најгласно досега скандираа „Оставка, оставка“ и „Мафија на робија“.

Специјалната единица за боење на Шарената револуција вечерва соборува рекорди. Додека со два чатала се решеташе фасадата, со пушки се боеше и оградата на Владата. Шарени се сите столбови на оградтата од главниот влез до мостот „Гоце Делчев“ односно боја фрлија демонстрантите секаде каде што немаше полиција.
„Многу ни е добар чаталот“ скандираа шарените и извикуваа „Ура“ по секој погодок на фасадата.

Демонстрантите решија денес да не ја откриваат трасата по која ќе се двжат во знак на револт од односот на полицијата кон нив.
„Досега уредно пријавувавме каде ќе се движиме, а МВР постојано ни правеше проблеми во трасата. Вечерва не кажуваме каде одиме, МВР нека не наоѓа“, велат демонстрантите.

„Ќе се чаталиме до слобода“, напишаа на големиот транспарент. Се собраа пред Специјалното јавно обвинителство но не тргнаа кон Собрание туку во спротивната насока. Се движеа по улицата „Ленинова“ или по ново „Аминта Трети“, каде што воопшто нема полиција, а потоа преку„ Партизанска“ и „Климент Охридски“ стигнаа пред Влада.

Возачот на комбето кој доцна синоќа беше приведен во полициската станица „Пролет“, денес е со демонстрантите. Од разгласот и вечерва пушта музка за шарените револуционери.
„По вчерашниот протест, продолжија приведувањата како мерка за заплашување и пригушување на отпорот. Овој пат приведен е возачот на комбето чиј разглас го користиме да сме погласни на протестот. Со секое нивно заплашување стануваме побројни, похрабри и поистрајни во борбата“, напишаа денес на Фејсбук профилот организаторите од „Протестирам“ и уште еднаш повторија дека остануваат на улица се до целосно разрешување на кризата.