1 Да не сте чуле, да не има случајно некои специјални партиски продавници каде што има посебни цени само за членови на ВМРО-ДПМНЕ и на коалицијата? Ако на премиерот Христијан Мицкоски и на министерката за финансии Гордана Димитриеска-Кочоска целта им е да нѐ уверат дека стандардот расте и покрај растот на инфлацијата, тогаш воопшто нека не си го трошат времето кај своите лојални гласачи. Ним ако партијата им рече дека стандардот им расте, ќе се убедат дека им расте.

Од друга страна, пак, штом стандардот расте, тогаш бадијала СДСМ ги убедува луѓето дека тонат во сиромаштија. Сега, кога граѓаните си се побогати во време на ВМРО-ДПМНЕ, баш им е гајле што СДСМ ги убедува дека се посиромашни.

Можат премиерот и министерката за финансии колку сакаат да ни кажуваат бројки и проценти, да ни откриваат дека „растот на платите е двојно зголемен во однос на периодот кога владееше СДСМ“ и oти „животниот стандард не е намален, напротив – за разлика од периодот кога опозицијата беше на власт, тој е зголемен“. Едноставно, кога зборуваме за стандардот нема потреба никој да нѐ убедува во чие време живееме подобро. Нека не си го трошат муабетот и власта и опозицијата, оти за разлика од сите други песни што ни ги пејат, барем за оваа секој од нас самиот си има увид. Еднаш кога ќе ни легне платата на сметка. И потоа секојдневно со секое одење до самопослуга.

2 Власта запнала да нѐ убеди дека ни расте стандарот, а нема па да ни претстави почеток на предизборна кампања како Саем на градоначалници. Цареви се за измислување помпезни имиња и настани. Демек – Саем-Отчет на градоначалниците на ВМРО-ДПМНЕ „4 години работа за тебе“. Ама и цареви се да смислат како да се изигра Изборниот законик. Да почне кампањата за локални избори пред законски да почне кампањата.

На Саемот со отчет се претставија сегашните градоначалници, од кои повеќемината повторно ќе одат на избори.

Нејсе. Отчетот си е отчет. Партиска работа. Ама, ме збуни ова што настанот го крстија саем. Оти, на саем нели се претставуваат иновации, нови производи, нови модели, усовршени варијации на старите модели… Доаѓаат посетители, ги разгледуваат моделите, се распрашуваат за перформансите, се запишуваат на листа на чекање ако сакаат да го купат производот, плаќаат аванс, склучуваат договори…

И што се случува на Саем на градоначалници? Замислете, доаѓа инвеститор и си избира градоначалник. Вика: овој модел ми се допаѓа, сочувајте ми го за после избори. А Мицкоски како одговорен за комерција им вика: запишете се на списокот и кога ќе излезе новиов модел ќе ви биде на располагање.

А капар? Оставаат ли капар? Ќе видиме кога ќе излезат сметките за партиски донации кој инвеститор колку капар оставил.

3 Саемот на градоначалници на ВМРО-ДПМНЕ не беше комплетен. Фалеше главниот и најскапиот  експонат – градоначалничката на Скопје Данела Арсовска. Само таа не даде отчет. Иако, во случајов баш ВМРО-ДПМНЕ требаше да им даде отчет на сите скопјани што ги измами да гласаат за неа пред четири години.

Главна тема на семејни дискусии во сите скопски маала летово е: Дали дојде ѓубрарката да го собере ѓубрето? А кога ќе дојде, луѓето трчаат по неа да ја собере и нивната канта, оти не го собира сето ѓубре.

И премиерот рече дека една од главните теми на локалните избори, не само во Скопје, ќе биде хигиената.

Данела Арсовска излезе неспособна да го исчисти ѓубрето. Ама на ВМРО-ДПМНЕ, што ја донесе на власт и што го има мнозинството и во Советот на Град Скопје и во сите управни одбори на градските претпријатија, а и апсолутна власт во повеќето скопски општини, тоа и му е намерата – да нѐ остави да се задушиме во ѓубре цело лето. За кога ќе победат на избори одма следниот ден да биде стакло чисто – дека тие се многу способни. А во меѓувреме, измрцварени и отруени од реата што се шири од контејнерите и од чадот од запалените диви депонии, ние ќе заборавиме дека баш овие способниве хигиеничари од ВМРО-ДПМНЕ ја избраа „мајката на градот“ и „најдобрата менаџерка“, се скараа за пари и ја оставија да го упропасти и уназади главниот град. И така, скарани со меморијата, ќе се радуваме дека ВМРО-ДПМНЕ ќе дојде да нѐ спаси од ВМРО-ДПМНЕ кога ќе ни соопштат дека историски, како никогаш досега, ќе биде собрано ѓубрето.

Силно ќе светне денот кога кандидатката на ВМРО-ДПМНЕ ќе биде заменета со кандидат на ВМРО-ДПМНЕ.

Е до тука дојдовме. Во 2025 година, во главниот град на земја-членка на НАТО и кандидатка за членство во ЕУ, за локални избори приоритет да ни биде да дојде доволно голема ѓубрарка да го собере и нашето ѓубре, а не само на комшиите.

Не правиме муабет дали живееме во град или село. Ние се чудиме дали живееме во овој век.

АУДИО ВЕРЗИЈА – AUDIO PODCAST