Претседателката на Националниот комитет за имунизација проф. д-р Александра Грозданова смета дека ако медицинско лице не верува во науката, нема потреба да биде дел од здравствениот систем, во однос на антиваксерската пропаганда на здравствените работници.

Во земјава досега, вели таа, против ковид-19 се вакцинирани 75 отсто од здравствените работници се вакцинирани, а утре се очекува владината одлука, по предлогот на Комисијата за заразни болести, дали оваа вакцина ќе стане задолжителна за здравствениот сектор.

Д-р Грозданова, која е и професорка на Фармацевтскиот факултет, на денешна трибина на невладина организација, рече дека како медицинско лице не може да ги сфати сѐ почестите дојави дека лекари земаат пари, ги истураат вакцините и им издаваат сертификати на пациентите, како да ја примиле дозата.

• ЛЕКАРСКАТА КОМОРА НЕ Е НАДЛЕЖНА ЗА АНТИВАКСЕРСКИТЕ ПРОПАГАНДИ НА ДОКТОРИТЕ НА ФЕЈСБУК, ВЕЛИ ПРЕТСЕДАТЕЛКАТА Д-Р ГРИВЧЕВА-СТАРДЕЛОВА
• ЌЕ ПОДНЕСЕМЕ ПРИЈАВИ АКО ПРОДОЛЖИ ГОВОРОТ НА ОМРАЗА КОН ЛЕКАРИТЕ, ПРЕДУПРЕДИ ЛЕКАРСКАТА КОМОРА ПО ПРОТЕСТОТ НА АНТИВАКСЕРИТЕ

„Задршката која медицинските лица ја имаат генерално за вакцинацијата е болна тема за нас медицинарите. Ние досега едуциравме 800 здравствени работници на оваа тема. За нас е поразително дека здравствени работници се промотори на невакцинирањето, верувајте, и професионално и етички е неисправно, поразително е што ја немаме комплетната поддршка од здравствените работници. Верувам дека има начин и механизми за тоа да се реши, има и други институции“, рече д-р Грозданова.

Таа повтори дека ако едно лице прележало ковид-19 и има високо ниво на антитела, нема никаква здравствена последица да прими вакцина, како и дека и Светската здравствена организација (СЗО) препорачува дека вакцината треба да се прими најбрзо што може да може после оздравувањето.

Според последните информации од Министерството за здравство, во петокот и саботата аплицирани се вкупно 5.611 дози вакцини, од кои 2.387 се аплицирани како прва доза, 1.163 се ревакцинирани, а 2.061 граѓани примиле трета доза вакцина. Заклучно со 21 ноември вкупно се вакцинирани 822.751 граѓани, ревакцинирани се 789.905, а трета доза примиле 63.137 граѓани. 57% од граѓаните над 40 годишна возраст се ревакцинирани, а 33% од популацијата од 18 до 39 години примиле барем една доза вакцина.

Опфатот со вакцинација со една доза вакцина, на полнолетната популација е 58% , а со две дози опфатени се 47% од граѓаните над 18 години. Според бројот на аплицирани вакцини, 39% од целата популација во нашата земја е вакцинирана, а 38% од популацијата во државата примила две дози вакцина.

Б. НЕСТОРОСКА