Ако Владата не им даде пари на Општините да си ги платат сметките за струја ќе следат радикални чекори, најави градоначалничката на Скопје Данела Арсовска, во име на Заедницата на единиците на локалната самоуправа (ЗЕЛС), каде што е претседателка. Таа, гостувајќи во емисијата Економски магазин на Алсат телевизија, кажа дека на седницата на ЗЕЛС одржана во вторникот бил донесен заклучок да се најде решение со разговор, оти ако нема помош од централната власт ќе имаме целосно нефункционални општини.
„Доколку нема разговор, вториот заклучок кој го донесе ЗЕЛС е радикализација. Треба да разбереме дека имаме 81 општина од кои повеќето се мали, рурални, кои што немаат начин како да генерираат повеќе средства. Нивното функционирање, начинот на којшто работат и постојат е доведено во опасност од оваа ситуација, а неизвесно е истата до кога ќе трае. Доколку не добиеме помош од централната власт ќе добиеме целосна нефункционалност на малите општини. Тие веќе го имаат потрошено буџетот предвиден за електрична енергија со сметки за два месеци. Ситуацијата и со јавните комунални претпријатија е до толку алармантна, што прекинот на електрична енергија директно влијае и може да доведе до прекин и на водоснабдувањето. Затоа треба уште еднаш убаво да се размисли како ќе се реагира, затоа што ова се јавни услуги кои се од интерес пред се за граѓаните. Ние не зборуваме само за јавни претпријатија или општини, ние зборуваме за граѓаните на овие општини“, кажа Арсовска.
Премиерот Димитар Ковачевски во средата при посета на текстилна фабрика одговарајќи на новинарско прашање за постојаните барања на градоначалниците на општините за помош изјави дека во време на криза, сите чинители треба да придонесат со своето работење и однесување.
„Кога се правеше буџетот на Република Северна Македонија, во него се предвиде ставка за справување со кризата. Јас сметам дека тоа требаше да го направат и општините“, кажа Ковачевски додавајќи дека Владата е таа која обезбеди пари за да се реши проблемот со парното греење во главниот град, а Град Скопје не сакал да учествува ниту со 500.000 евра за решавање на овој проблем.
Досега ЗЕЛС имаше една средба со економскиот тим на Владата предводен од вицепремиерот Фатмир Битиќи пред еден месец, на која беа пренесени проблемите со кои се соочуваат Општините. И Битиќи во вторникот при гостување на ТВ 24 ѝ рече на Арсовска дека не може само да бараат помош, а ниту денар општините да не предвидат за справување со кризата.
„Ние не сме кажале дека нема да помогнеме, само бараме сите да бидат вклучени. Владата никогаш нема да ги извиси граѓаните, а дали ќе споделиме тоа останува да се види. Како што се бориме на политичкиот мегдан и овде треба да се бориме заедно, а ако некој едноставно се откаже од надлежностите и каже јас толку знам, има секогаш демократско право да го врати мандатот и граѓаните да одлучат“, рече Битиќи.
Арсовска му одговори дека и Владата може да го врати мандатот ако не им обезбеди помош на граѓаните и како што им дала пари пред неколку години за покривање на долговите, треба и сега тоа да го направи кога е енергетска и економска криза.
А. АНТЕВСКА
