Невладините организации, активистите, граѓаните за објектот кај Лагадин требало да делуваат кога се носел Деталниот урбанистички план, а сега кога веќе планот е донесен работата е завршена, рече денеска в. д. градоначалникот на Општина Охрид Константин Георгиески.

Откако минатата недела премирот Зоран Заев му кажа на инвеститорот на хотелот кај Лагадин, дека лично ќе се заложи предметот да биде решен во негова корист, Георгиески вели дека минатата недела од Второстепената комисија стигнала одлука дека жалбата на инвеститорот е усвоена.

„Сега предметот е вратен на прв степен. Во овој случај има решение од Државен градежен инспекторат кој што е во состав на Министерството за транспорт и врски, а друг орган на истото министерство односно Второстепената комисија го поништува решението. Ќе мораме да видиме како тој план е донесен, одобрението за градба е издадено врз основа на детален урбанистички план. Во моментов во Општина Охрид се спроведува ревизија за начинот на кој се донесени сите урбанистички планови, дали се донесени легално и законски. Сите тие засегнати структури од невладини организации, активисти, граѓани требало да делуваат кога се носел планот. На донесен план на 50 метри од брег да има објект, завршена е работата“, рече в. д. градоначалникот Георгиески.

Изградбата на хотелот во Лагадин прекршува вкупно 12 закони, 1 подзаконски акт и не е во согласност со Уставот на Република Македонија. Дополнително, Инспекторатот за животна средина потврди дека градбата се наоѓа во заштитените 50 метри од брегот на езерото во кои не се дозволени објекти од цврста градба.

• ЗАЕВ ВЕТИ ДЕКА ЌЕ ПОМОГНЕ ДА СЕ ДОГРАДИ ХОТЕЛОТ ВО ЛАГАДИН ШТО ПРЕКРШИ 12 ЗАКОНИ

• ЗАЕВ ПРОТИВ ПРЕПОРАКИТЕ НА СОБРАНИЕТО, УРГИРА ЗА ГРАДБИ НА ОХРИДСКИОТ БРЕГ НАСПРОТИ БАРАЊАТА ЗА МОРАТОРИУМ ОД УНЕСКО

• ПРЕМИЕРОТ НЕ СМЕЕ ДА ОЗАКОНУВА КРИМИНАЛНИ ГРАДБИ ВО УНЕСКО РЕГИОН, МУ УКАЖА „ОХРИД СОС“ НА ЗАЕВ

Во однос на препораките на УНЕСКО да се постави мораториум на градба во Охрид, Георгиески вели дека на донесени не може да се донесе забрана за градба.

„Како на инвеститор да не му дадам одобрение на градба кога веќе планот е донесен. Кога ќе дојде инвеститор и ќе побора одобрение за градба на постоечки план јас како градоначаник сум должен да постапам до тоа барање. Мораториумот на градба е во носењето на планови, на донесени планови ние не можеме да воспоставување мораториум, како на луѓето да не им дозволиме да градат за планови кои се донесени, со тоа им го скратуваме правото. Кога ќе ги носиме плановите таму треба добро да делуваме“, додаде Георгиески.

• ТРИ ПАТИ Е ПОНИШТЕНО РЕШЕНИЕТО ЗА ГРАДБА НА ХОТЕЛОТ КАЈ ЛАГАДИН, КАЖА ОХРИДСКИОТ ГРАДОНАЧАЛНИК СТОЈАНОВСКИ ПО ПРОТЕСТОТ ПРЕД ОПШТИНАТА

• ХОЛАНДСКИОТ ТУИ НЕ Е ИНВЕСТИТОР НА ДИВИОТ ХОТЕЛ ВО ЛАГАДИН ШТО ПРЕКРШИ 12 ЗАКОНИ

А. АНТЕВСКА