„Визер“ ќе лета само во летната сезона за Барселона и Векшо од скопскиот аеродром и за Лондон од охридскиот, велат од унгарската нискобуџетна авиокомпанија. Откако денес беше објавено дека компанијата од зимската сезона нема да лета за Барселона, Лондон и Векшо, попладневно од „Визер“ објаснија дека летовите не се целосно укинати, односно дека ќе се лета и на овие дестинации, но само преку лето.
„Вообичаена пракса во авионската индустрија е фреквенциите на летовите да се менуваат според патните периоди и перформансите на рутите. ’Визер‘ постојано ги следи перформансите на своите рути за да овозможи најпопуларните дестинации да имаат најниски цени. Рутите од Скопје до Векшо и Барселона како и од Охрид до Лондон-Лутон се оптимизирани според барањата на пазарот и ќе бидат функционални само во летната сезона. Наскоро, авиокомпанијата ќе го објави летниот распоред за 2019 година и патниците ќе можат веќе да ги планираат своите патувања и да ги резервираат своите карти“, велат од „Визер“.
Нискобуџетната унгарска компанија лета од Македонија седум години и досега има превезено 4,6 милиони патници. Од 2011 година откако „Визер“ почна да лета од земјава, добива субвенции од Владата и тоа од 25.000 до 40. 000 евра по новоотворена линија плус од 9 до 13 евра по заминат патник од македонските аеродроми.
Договорот за субвенционирање на „Визер“ со Владата истече во јуни. Минатата недела беше поништен јавниот повик за субвенционирање на нискобуџетни компании, а министерот за транспорт и врски Горан Сугарески денеска изјави дека нов повик ќе биде објавен наредната недела и дека Владата има предвидено пари за оваа намена и помошта за нискобуџетни компании ќе продолжи во иднина.
А. АНТЕВСКА
