СВЕЖА САЛАТА ПОЛНА СО ФЕКАЛИИ ГИ ЗАТРУЛА ФУДБАЛЕРИТЕ НА ПЕЛИСТЕР

    СВЕЖА САЛАТА ПОЛНА СО ФЕКАЛИИ ГИ ЗАТРУЛА ФУДБАЛЕРИТЕ НА ПЕЛИСТЕРОд управата на ФК Пелистер кажаа дека ручале во ресторан во Велес, за половина час подоцна да се јават стомачни тегоби кај 12 фудбалери; - Фудбалерите во болницата во Велес (Фото: Фејсбук)

    Сезонската свежа салата која ја јаделе во Велес фудбалерите на битолски ФК Пелистер била причина што кај 12-мина од нив има знаци на труење. Ова го покажале резулатите од испитувањето на храната, спроведено од Центарот за Јавно здравје Велес (ЦЈЗ ), а која ја јаделе 28-те члена од екипата на ФК Пелистер која ручала на пропатување во Велес. Во саботата, поради симптоми на труење со храна во инфективното одделение на Општата Болница Велес беа хоспитализирани 12-те фудбалери.

    „Со извршените лабораториски испитувања, утврдено е дека кај земените мостри храна, салати од морков, зелка и цвекло, има присуство на бактерии од фекално потекло – индикатор на фекална контаминација. Испитаните мостри согласно извршените лабораториски испитувања одговараат на микробиолошките критериуми за безбедност на храната, но не и на хигиената на производствениот процес“, пишува во информацијата на Агенцијата за храна и ветеринарство.

    Кај овие зеленчуци била пронајдена бактерија Enterococus fekalis, и тие не биле доволно измиени оти при нивното одгледување е користена загадена вода со фекалии. Со идентична информација се јавија и од Државниот санитарен и здравствен испекторат (ДСЗИ).

    „Резултатите на Центарот за Јавно здравје Велес потврдија присуство на бактерија во еден вид салата. На брисевите од неколку вработени, потврдено е присуство на патогени бактерии. Стручно мислење на ЦЈЗ Велес потврдува труење со храна. ДСЗИ постапи по протокол, кој се применува во ваков случај кујната од објектот е затворена на самиот ден на вонредниот инспекциски надзор“, пишува во информацијата од д-р Ирина Сотирова Бухова директор на ДСЗИ.

    Кај останатите земени мостри од храната која ја јаделе фудбалерите на ФК Пелистер од Битола, кечап, шпагети, лепче, пилешки стек и бистра супа, анализите не констатирале отстапувања на безбедносните и хигиенските критериуми за храна. Со лабораторските испитувања на земените брисеви од работните површини, приборот и опремата која се користела во кујната не се констатирани отстапувања, што укажува на задоволително ниво на хигиена. По извршениот вонреден санитарно – хигиенски преглед кај 34 лица вработени во кујната и келнери во хотелот, сите со уредни санитарни книшки при вонредната инспекциска контрола, кај 7 се изолирани бактерии во нос и грло. Инспекциите наредиле тие веднаш да бидат отстранети од работа и да почнат со лекување. Извршена е вонредна дезинфекција на кујната, и таа ќе биде пуштена во употреба по добивање на задоволителен лабораториски наод.

    П. ПЕЧКОВ

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари