За да може да се аплицира за добивање владини субвенции за набавка на инвертери за греење ќе треба сопствените печки на дрва да се дадат на отпад. Во Владата денеска беше презентиран проектот за доделување субвенции за инвертер клими на 10.000 домаќинства од Скопје, Битола, Кичево и Тетово, во рамките на мерките против аерозагадувањето.

„Граѓаните ќе добијат ваучер во вредност од 1.000 евра за набавка на инвертер клима. На фирмата од каде што ја купиле, кога ќе ја монтира, домаќинството ќе треба да им ја предаде печката на која досега го загревале домот. Потоа тие печки ќе се носат на легални отпади кои ќе бидат наведени. Исто така, граѓаните ќе треба да потпишат и изјава дека нема повеќе да се греат на нееколошки начин. Оваа мерка дала резулатите во борбата против загадувањето во Данска, Германија, Англија, а во моментов се спроведува во Бугарија, Словачка и Полска“, рече заменик-министерот за животна средина Јани Макрадули.

Со мерката ќе бидат опфатени 5.200 домаќинства од Скопје, 2.500 од Битола, 1.500 во Тетово и 800 во Кичево.  За субвенции во Скопје ќе можат да аплицираат и домаќинставата од општините кои не се во склоп на Град Скопје односно Арачиново, Сопиште, Илинден. Предност во процесот ќе имаат семејствата кои имаат месечни приходи до 30.000 денари.

Премиерот Зоран Заев рече дека очекува за три години преку вакви мерки нееколошниот начин на затоплување целосно да биде исфрлен од домовите.

На прес-конференцијата беше кажано дека годишно во Скопје се сечат 317.000 тони дрва, а во цела земја бројката е 1,1 милион метри кубни. Според податоците од 2016, дури 40 отсто од дрвата се исечени од дрвокрадци.

Парите за субвенционирање на инвертери во висина од 10 милиони евра се обезбедени од ЕСМ.

А. АНТЕВСКА