Премиерите на Република Северна Македонија Димитар Ковачевски и на Република Бугарија Кирил Петков, кој денеска со висока бугарска делегација ја посети нашата земја, договорија нов метод на решавање на нерешените меѓудржавни прашања.
Првин она што им е попотребно на двете држави – заживување на комуникацијата, соработката, зближувањето меѓу граѓаните на двете држави, а потоа нерешените историски прашања. Досега беше обратно и соработката се вкопа во место. Петков и Ковачевски се убедени дека зближувањето и соработката ќе си придонесат во решавањето на отворените прашања.
На прашање кон Ковачевски: „Готови ли сте да ги исполните барањата од Бугарија за примената на јазиците во преговорите со ЕУ и дали зборувавте за обновување на работата на историската комисија?“, од страна на новинарка од Бугарија, премиерот одговори:
„Ние сме држава признаена од Република Бугрија, а која во уставното уредување го има македонскиот јазик. Имаме потпишано договори, каде се регулира начинот на кој се потпишани тие договори, согласно официјалните јазици на државите. Нашиот македонски јазик е дел од Повелбата на Обединетите нации и од другите мултилатерални институции каде членуваме. Оттука, со напредокот на работата во комисиите што денеска ги договоривме со Кирил, во делот што значи подобар живот за сите граѓани, и зближување на граѓаните од двете држави, сите овие прашања за историските делови ќе бидат во втор план. Во прв план ќе биде соработката на граѓаните од Северна Македонија и од Република Бугарија. Ова ќе ни даде доволен стимул да го постигнеме крајниот резултат – договор со Бугарија и отпочнување на преговорите со ЕУ“.
Премиерот Петков кажа дека неделно ќе се среќаваат претставниците на работните групи од двете држави од областа на економијата, културата, иновациите, образованието и за историја и резултатите ќе бидат набргу видливи. Тој денеска ја соопшти веста дека за Бугарија веќе не е проблем скратеното име Северна Македонија, зашто Северна Македонија, како што рече, испрати вербална нота до ОН дека оваа кратенка не значи територијални аспирации кон (делови) на Бугарија.
Петков, кажа и дека авиолинијата Софија-Скопје ќе биде реалност.
На прашање од новинарите за македонскиот јазик, тој одговори дека го почитува самоопределувањето на граѓаните на Северна Македонија.
„Ние го поддржуваме самоопределувањето на граѓаните на Република Северна Македонија, ги почитуваме сите јазици кои се користат овде и ние ќе продолжиме да го почитуваме тоа. Неразјаснетите прашања во историската комисија, отсега ќе се разрешуваат со поинаков тон, од поинаков фокус“, кажа Петков. Тоа му беше одговорот генерално и за нерешените прашања за „бугарски фашистички окупатор“ во учебниците во Македонија, со констатација „секако тие прашања ќе треба да се решат“.
С. К. ДЕЛЕВСКА
